Прадстаўніца АПК Рыжычэнка заклікала ў Парыжы партнёраў падтрымаць стратэгію еўрапейскай інтэграцыі Беларусі
7 кастрычніка, Позірк. Падтрымаць “дарожную карту еўрапейскай інтэграцыі Беларусі” заклікала партнёраў прадстаўніца па эканоміцы і фінансах Аб’яднанага пераходнага кабінета (АПК) Аліса Рыжычэнка, выступаючы 7 кастрычніка на трэцяй сустрэчы Альянсу парламенцкіх груп “За дэмакратычную Беларусь”, арганізаванай Нацыянальным сходам Францыі.
Паводле яе слоў, неабходна падтрымаць таксама распрацоўку эканамічных рэформ для Беларусі і адукацыйныя праграмы беларускіх спецыялістаў.
“Галоўная задача дэмакратычных сіл — прапанаваць беларусам не толькі палітычную, але і эканамічную альтэрнатыву, — цытуе Рыжычэнку прэс-служба АПК. — Не ілюзію, а рэальны выбар — еўрапейскі шлях развіцця, які дасць краіне стабільнасць, прадказальнасць і магчымасць стаць надзейным партнёрам для ўсяго рэгіёна”.
Рыжычэнка адзначыла, што пакуль Расія прапануе Беларусі “залежнасць”, неабходна прапанаваць “выбар — выбар свабоды, справядлівасці і еўрапейскіх магчымасцяў”. Толькі так, паводле сцвярджэння прадстаўніцы АПК, Беларусь “зможа аднавіць свой эканамічны суверэнітэт і палітычную незалежнасць”.
“Дэмакратычная Беларусь — гэта не мара, а праект, у якім выйграе ўся Еўропа”, — падкрэсліла Рыжычэнка.
Па запрашэнні старшыні Нацыянальнага сходу Францыі 6–7 кастрычніка Парыж наведвае дэмакратычны лідар Святлана Ціханоўская. У сталіцы Францыі таксама знаходзіцца намеснік кіраўніка Аб’яднанага пераходнага кабінета, кіраўнік Народнага антыкрызіснага ўпраўлення (НАУ) Павел Латушка.
