Колькасць рэлігійных арганізацый зменшылася пасля перарэгістрацыі на 4,6%

8 кастрычніка, Позірк. Дзяржаўную перарэгістрацыю ў Беларусі прайшло 3.426 рэлігійных арганізацый, у выніку іх колькасць зменшылася на 4,6% (да перарэгістрацыі было 3.592), паведамляе ініцыятыва “Хрысціянская візія”.

Спасылаючыся на афіцыйны даклад уладаў Беларусі для Універсальнага перыядычнага агляду ў Камітэце правоў чалавека ААН, ініцыятыва адзначае, што колькасць канфесій і рэлігійных плыняў у краіне не змянілася — 25, колькасць суполак зменшылася да 3.257 (3.419; -4,7%), арганізацый агульнаканфесійнага значэння — да 169 (173; -2,3%).

“Найбольш моцна” перарэгістрацыя ўдарыла па Беларускай грэка-каталіцкай царкве, якая “сутыкнулася з беспрэцэдэнтным палітычным ціскам і на дадзены момант не змагла перарэгістраваць дастатковую колькасць прыходаў для стварэння рэлігійнага аб’яднання”, гаворыцца ў паведамленні.

Такім чынам, як адзначаецца, беларускія грэка-католікі страчваюць магчымасць “рэалізацыі цэлага шэрагу аспектаў свабоды рэлігіі, якія ў сучаснай Беларусі замацаваныя толькі за рэлігійнымі аб’яднаннямі”.

Рэпрэсіі, эміграцыя і ўплыў “рускага свету” з’яўляюцца асноўнымі пагрозамі для цэркваў у Беларусі, заявіў 27 траўня каталіцкі вернік, журналіст Максім Гацак на анлайн-дыскусіі “Беларускія рэлігійныя супольнасці ў цені “рускага свету”.

Гацак канстатаваў, што з 2020 года не спыняюцца рэпрэсіі ў дачыненні да вернікаў і святароў. Значная частка гэтай супольнасці, паводле яго слоў, эмігравала, што стала “вялікай праблемай” беларускіх хрысціянскіх супольнасцяў, “моцна паўплывала на ўнутраную рэлігійную сітуацыю, на атмасферу ў царкве”.

Ён адзначыў, што прыняты ў 2024 годзе закон “Аб свабодзе сумлення і рэлігійных арганізацыях” ускладніў перарэгістрацыю рэлігійных абшчын, у выніку чаго многія з іх могуць страціць легальны статус. У прыватнасці, дадаў журналіст, ёсць пагроза закрыцця малых абшчын у невялікіх населеных пунктах.

Таксама варта “працягваць спрабаваць звяртаць увагу міжнароднай грамадскасці на праблему парушэння свабоды веравызнання і рэпрэсій у Беларусі”, рэзюмаваў ён.

За пяць гадоў — пасля прэзідэнцкіх выбараў 9 жніўня 2020 года і па 30 верасня 2025-га — у Беларусі ліквідавана не менш за 1.970 НКА — аб’яднанняў, прафсаюзаў, фондаў, недзяржаўных устаноў, асацыяцый, вынікае з новага агляду праваабарончай арганізацыі Lawtrend.