Прэм’ер Літвы: Меры па бяспецы Ціханоўскай падабраныя зыходзячы з узроўню пагроз

9 кастрычніка, Позірк. Ахова дэмакратычнага лідара Беларусі Святланы Ціханоўскай “не знята”, меры па яе бяспецы “падабраныя зыходзячы з узроўню пагроз”, заявіла прэм’ер-міністр Літвы Інга Ругінене 8 кастрычніка ў Каўнасе, адказваючы на ​​пытанне журналістаў.

Паводле кіраўніка ўрада, піша Delfi, літоўскія службы “выдатна выконваюць сваю працу, штодня ацэньваючы ўзровень пагроз і мадэлюючы, якія меры бяспекі варта прымяняць на аснове гэтага”.

У Ціханаўскай “ёсць ахова, але яна скарэкціравана з улікам бягучых рэалій”.

7 кастрычніка стала вядома, што Літва зніжае ўзровень фізічнай аховы Ціханоўскай, якая разам з сям’ёй пражывае ў Вільні.

З-за зніжэння Літвой узроўню фізічнай аховы беларускага дэмлідэра яе офіс прыпыняў працу, паведаміў літоўскаму парталу LRT дарадца палітыка па дыпламатычных пытаннях Дзяніс Кучынскі.

Паводле яго слоў, апавяшчэнне аб рашэнні было атрымана 1 кастрычніка, і не было часу адаптаваць дзейнасць да змен.