У рамках праверкі беларускія ўлады прыводзяць войска ў “найвышэйшыя ступені” баявой гатоўнасці

11 кастрычніка, Позірк. У Беларусі “з мэтай праверкі” праводзіцца “комплекс мерапрыемстваў” па прывядзенні Узброеных сіл у “вышэйшыя ступені” баявой гатоўнасці, паведаміла 11 кастрычніка прэс-служба Міністэрства абароны.

Паводле інфармацыі ведамства, гэта робіцца на даручэнне Аляксандра Лукашэнкі і ў рамках праверкі баявой гатоўнасці.

“Шэраг падраздзяленняў ажыццявяць комплекс мерапрыемстваў па пераводзе ў баявую гатоўнасць, вырушаць у прызначаныя раёны і выканаюць мерапрыемствы, вызначаныя ў распараджэнні. Праверка праводзіцца пад кіраўніцтвам Дзяржаўнага сакратарыята Савета Бяспекі Рэспублікі Беларусь”, — гаворыцца ў паведамленні.

Рэжым Лукашэнкі няспынна праводзіць вучэнні, трэніроўкі, зборы на фоне абвастрэння стасункаў з Захадам і поўнамаштабнай вайны Расіі супраць Украіны.