У дзень, калі Вітольду Ашурку споўнілася б 55 гадоў, Ціханоўская зноў запатрабавала вызваліць палітвязняў

13 кастрычніка, Позірк. “Вітольд Ашурак сёння павінен быў бы адсвяткаваць 55-годдзе, але ён памёр у 2021 годзе як палітвязень беларускага рэжыму”, — адзначыла 13 кастрычніка дэмакратычны лідар Святлана Ціханоўская.

“Многія дагэтуль утрымліваюцца ў нечалавечых умовах і пазбаўленыя медыцынскай дапамогі. Да 200 вязняў знаходзяцца ў зоне асаблівай рызыкі. Мы не можам чакаць новых смерцяў. Іх павінны вызваліць”, — напісала палітык на сваёй старонцы ў сацыяльнай сетцы Х.

50-гадовы палітвязень Вітольд Ашурак, які памёр 21 траўня 2021 года пры нявысветленых абставінах у шклоўскай калоніі № 17 (Магілёўская вобласць), мусіў выйсці на волю 9 чэрвеня 2025-га.

У дзень, калі актывіст мусіў вызваліцца, праваабарончы цэнтр “Вясна” нагадаў, што першапачаткова Ашурка затрымалі 9 жніўня 2020 года і арыштавалі на 20 сутак: за ўдзел у акцыі — на 15, за “непавагу да суда” — 5 (мужчына не ўстаў, калі ў залу пасяджэння).

19 верасня таго ж года Ашурка зноў арыштавалі ў адміністрацыйным парадку, а праз месяц яму выставілі крымінальнае абвінавачанне.

18 студзеня 2021 года суддзя Максім Філатаў з суда Лідскага раёна (Гродзенская вобласць) прыгаварыў Ашурка да 5 гадоў пазбаўлення волі ва ўмовах агульнага рэжыму паводле арт. 342 (арганізацыя групавых дзеянняў, якія груба парушаюць грамадскі парадак) і арт. 364 (гвалт або пагроза прымянення гвалту ў дачыненні да супрацоўніка органаў унутраных спраў) Крымінальнага кодэкса. Працэс праходзіў у закрытым рэжыме.

Расследаванне смерці палітвязня было замарожанае і дэ-факта не вядзецца.

У гадавіну смерці Вітольда Ашурка — 21 траўня — дэмакратычная грамадскасць з ініцыятывы праваабаронцаў праводзіць Міжнародны дзень салідарнасці з беларускімі палітвязнямі.

На 13 кастрычніка ў спісе “Вясны” фігуруе 1.221 палітвязень, у спісе праваабарончай ініцыятывы Dissidentby — 1.352. Рэальная колькасць рэпрэсаваных з палітычных матываў можа быць значна большай.