Ціханоўская: Незалежныя СМІ робяць так, каб беларусы ведалі праўду, якую рэжым спрабуе схаваць
16 кастрычніка, Позірк. Незалежныя СМІ “выконваюць жыццёва важную працу”, у прыватнасці, “змагаюцца з прапагандай рэжыму”, захоўваюць беларускую культуру і “робяць так, каб беларусы ведалі праўду, якую рэжым спрабуе схаваць”, заявіла дэмакратычны лідар Святлана Ціханоўская.
“Нават у выгнанні яны працягваюць сваю місію з вялікай смеласцю і сумленнасцю”, — напісала палітык на сваёй старонцы ў сацыяльнай сетцы Х.
Гэтым паведамленнем дэмлідар адрэагавала на наведванне тэлеканала “Белсат” дыпламатамі, якія прадстаўляюць Францыю і Германію ў АБСЕ, а таксама французскім спецпасланнікам па Беларусі.
“Штодзённая місія “Белсату” — даносіць інфармацыю да беларускага народа на розных мовах як для аўдыторыі ўнутры краіны, так і па-за яе межамі, праз тэлебачанне і анлайн-платформы. Яны выконваюць яе з захапленнем і адданасцю справе, нягледзячы на пераслед з боку рэжыму Лукашэнкі”, — гаворыцца ў паведамленні па выніках візіту, апублікаваным французскім прадстаўніцтвам у АБСЕ.
Пасля падаўлення маштабных пратэстаў супраць сфальсіфікаваных прэзідэнцкіх выбараў 2020 года і жорсткасці сілавікоў рэжым Аляксандра Лукашэнкі стаў метадычна знішчаць непадкантрольную яму частку медыясектара. Асноўныя незалежныя СМІ былі разгромленыя, многія іх супрацоўнікі трапілі пад крымінальны пераслед ці былі вымушаныя пакінуць краіну, ратуючыся ад рэпрэсій, і аднавіць працу за мяжой.
Дзейнасць і матэрыялы незалежных СМІ метадычна абвяшчаюцца “экстрэмісцкімі”, за супрацу з імі пагражае крымінальная адказнасць.
