ААН застаецца ключавой пляцоўкай для пераадолення глабальных выклікаў, заяўляе Лукашэнка
24 кастрычніка, Позірк. Арганізацыя Аб’яднаных Нацый “нязменна застаецца найважнейшай пляцоўкай для перагавораў і пошуку аптымальных рашэнняў па пераадоленні глабальных выклікаў і пагроз”, адзначыў Аляксандр Лукашэнка, віншуючы 24 кастрычніка генеральнага сакратара ААН Антоніу Гутэрыша з 80-й гадавінай таго моманту, калі статут гэтай міжнароднай структуры набыў моц.
“Наша краіна брала ўдзел у падрыхтоўцы Статута ААН і з гонарам увайшла ў склад дзяржаў — заснавальнікаў Арганізацыі, альтэрнатывы якой не існуе і сёння, — прыводзіць тэкст паслання прэс-служба віншавальніка. — Таму беларусы адчуваюць адказнасць за захаванне яе моцнай і ўплывовай”.
На думку Лукашэнкі, ААН неаднаразова даказала сваю эфектыўнасць “у пытаннях калектыўнага рэагавання на надзвычайныя гуманітарныя сітуацыі і садзейнічання развіццю краін свету”.
Палітык адзначыў, што Беларусь шануе намаганні Арганізацыі і асабісты ўнёсак Гутэрыша ў “справу прадухілення канфліктаў і захавання агульначалавечых каштоўнасцей, якія ляжаць у аснове Статута ААН”.
“Хачу цвёрда адзначыць, што ў гэтай складанай дзейнасці вы заўсёды можаце разлічваць на падтрымку Беларусі”, — запэўніў палітык.
Дэмакратычны лідар Святлана Ціханоўская з нагоды 80-годдзя таго моманту, як Статут ААН набыў моц, адзначыла, што калі “тыраны аб’ядноўваюцца”, свабодны свет “павінен зрабіць тое ж самае — аб’яднацца ў мужнасці і дзеяннях у імя дэмакратыі і лепшай будучыні для ўсіх”. “Нашыя дзеці заслугоўваюць таго, каб расці ва ўмовах свабоды, а не ў страху”, — напісала яна на сваёй старонцы ў сацсетцы Х.
15 чэрвеня 2023 года, прымаючы даверчыя граматы шэрагу замежных амбасадараў, Лукашэнка заявіў, што ААН “з цывілізаванай дыялогавай пляцоўкі для вырашэння спрэчак і дыскусій пра будучае развіццё свету” ператварылася ў “дыпламатычнае казіно, дзе запраўляюць заходнія верхаводы”.
На яго думку, “калектыўны Захад” толькі “пакуль запраўляе ў ААН”. “Мы выступаем за шматпалярны, справядлівы свет з гарантыямі развіцця для ўсіх краін без выключэння. У гэты час Захад разбурае сістэму еўрапейскай бяспекі, створаную пасля Другой сусветнай вайны”, — адзначыў Лукашэнка.
4 ліпеня 2024 года ў Астане (Казахстан) на палях саміту ШАС падчас сустрэчы з Лукашэнкам Гутэрыш выказаў занепакоенасць сітуацыяй з правамі чалавека ў Беларусі. Ён выказаў пажаданне, каб амністыя, у выніку якой былі вызваленыя некаторыя палітвязні, стала “крокам да поўнай павагі правоў чалавека і асноўных свабод у Беларусі” (тая хваля памілаванняў палітвязняў завяршылася напрыканцы студзеня 2025 года — перад мерапрыемствам, якое Мінск лічыць “прэзідэнцкімі выбарамі”; пазней працэс аднавіўся ў рамках кантактаў рэжыму Лукашэнкі з прадстаўнікамі ЗША).
У кастрычніку 2024 года Гутэрыш узяў удзел у саміце БРІКС у расійскай Казані, за што пасля трапіў пад крытыку шэрагу заходніх лідараў. На палях форуму генеральны сакратар ААН правёў шмат сустрэч, у тым ліку з Лукашэнкам. Беларускі палітык, які падтрымлівае расійскую агрэсію супраць Украіны, падарыў Гутэрышу скульптуру буслоў, паведаміўшы, што гэта сімвал міру: “Нам, Антоніу, вельмі патрэбны мір”.
“Вы павінны ведаць, што мы заўсёды будзем побач з вамі, што тычыцца [пытанняў] міру і вайны. Мы за мір, за мірныя перамовы, за мірнае вырашэнне любых канфліктаў”, — адзначыў Лукашэнка. Ён прайшоў у абдымку з Гутэрышам некалькі метраў.
У той жа дзень Лукашэнка даў інтэрв’ю расійскай газеце “Известия”, у якім раскрытыкаваў дзейнасць ААН, заявіўшы, што быў бы не супраць з’яўлення ў свеце арганізацыі-супрацьвагі, каб “ААН заварушылася”. Ён выступіў за тое, каб праца ААН “была эфектыўнай, каб Савет Бяспекі вырашаў пытанне, а не проста збіралася там”, каб пытанні вайны і міру вырашаліся выключна на пляцоўцы арганізацыі.
28 лютага 2025 года міністр замежных спраў Максім Рыжанкоў на сустрэчы з пастаянным каардынатарам ААН у Беларусі Расулам Багіравым і кіраўнікамі акрэдытаваных у краіне агенцтваў арганізацыі сярод іншага заявіў пра неабходнасць “адрадзіць дух арганізацыі” ва ўмовах “узрослага канфліктнага патэнцыялу і ўсё большай глабальнай палярызацыі”.
