24 кастрычніка, Позірк. У 21 гадзіну 30 хвілін 24 кастрычніка Літва зноў закрыла мяжу з Беларуссю праз прылёт паветраных шароў.
Рашэнне аб прыпыненні працы пунктаў пропуску Мядзінінкай (з беларускага боку Каменны Лог) і Шальчынінкай (Беняконі) прыняў кіраўнік Службы аховы дзяржаўнай мяжы Літвы Рустам Любаеў “для забеспячэння бяспекі Літвы”, паведаміла прэс-служба ведамства.
Закрытыя таксама аэрапорты Вільнюса і Каўнаса. Самалёты перанакіроўваюцца ў Палангу (Літва), Рыгу (Латвія), Катавіцэ і Гданьск (Польшча).
Паводле інфармацыі прэм’ер-міністра краіны Інгі Ругінене, з Беларусі ў Літву “зноў была запушчана вялікая група кантрабандных метэазондаў”. Мяжа закрытая да 12-й гадзіны 25 кастрычніка.
“Службы працуюць у адпаведнасці з рашэннямі, прынятымі на пасяджэнні Камісіі нацыянальнай бяспекі на гэтым тыдні. Камісія зноў збярэцца на наступным тыдні, каб ацаніць наступствы ўжо прынятых рашэнняў і абмеркаваць, якія яшчэ меры можна прыняць у кароткатэрміновай перспектыве, каб нанесці шкоду як кантрабандыстам, так і рэжыму Лукашэнкі, які дазваляе ім бясчынстваваць”, — паведаміла кіраўнік урада.
Паводле яе слоў, цяпер самае галоўнае — не дапусціць пагрозы насельніцтву Літвы, таму прымаюцца адпаведныя рашэнні.
Упершыню мяжу з Беларуссю праз зонды Літва закрыла ўначы 22 кастрычніка. Транспартныя сродкі не афармляліся да раніцы.
Галоўны дарадца прэзідэнта Літвы Дэйвідас Матулёніс заявіў, што мяжа можа быць закрытая на больш працяглы тэрмін.
Паводле даных Дзяржаўнага памежнага камітэта Беларусі на 22 гадзіны, у пункце пропуску Беняконі было 60 легкавых аўтамабіляў (а 20-й гадзіне — 50) і 710 грузавых (столькі ж). У Каменным Логу ў чарзе было 10 легкавых аўтамабіляў (30), 810 грузавых (800) і ніводнага аўтобуса (0).
