Лукашэнка заявіў, што ў верасні ў Польшчу заляцелі ўкраінскія беспілотнікі

28 кастрычніка, Позірк. У апошні час Беларусь і Расію “вінавацяць у тым, што заўтра-заўтра-заўтра” яны могуць “адцяпаць” Польшчу, краіны Балтыі або “як мінімум Сувалкскі калідор <…> прабіць”, заявіў Аляксандр Лукашэнка 28 кастрычніка на III Мінскай міжнароднай канферэнцыі па еўразійскай бяспецы.

“Лухта поўная. Нікуды мы не нацэлены, ніякая Еўропа, Парыж і Лондан нам не патрэбныя, нават Літва і Польшча, нават Вільнюс і Варшава. Яны нам не патрэбныя. Нам не патрэбная гэта эскалацыя”, — сказаў ён.

“Дык чаму да 5% ВУП палякі трацяць на зброю, і нават Літва <…> без таго сціплы бюджэт адрывае на ўзбраенне?” — задаўся пытаннем аратар, не ўзгадаўшы шматлікія заявы ўладаў дзвюх краін пра тое, што ўмацаванне абараназдольнасці неабходнае ім для адбіцця магчымай агрэсіі з боку РФ і Беларусі.

Лукашэнка традыцыйна абвінаваціў суседнія краіны ЕС у агрэсіўных намерах адносна Беларусі, заявіўшы пры гэтым пра магчымасць супрацоўніцтва “па-чалавечы” з “Польшчай і Прыбалтыкай”. У якасці прыкладу такога супрацоўніцтва ён прывёў узаемадзеянне з польскімі вайскоўцамі падчас вераснёўскага залёту ў гэтую краіну беспілотнікаў.

“Беспілотнікі — як выявілася, украінскія — пра якія мы папярэдзілі палякаў… Мы не змаглі іх усе знішчыць. Мала часу было, ну і гэта заўсёды складана. Мы ім паведамілі”, — сказаў палітык.

Раніцай 10 верасня польскія ўлады паведамілі пра масавае ўварванне расійскіх дронаў на тэрыторыю краіны — першае за тры з паловай гады поўнамаштабнай агрэсіі РФ супраць Украіны. Паводле інфармацыі ўкраінскіх маніторынгавых каналаў, частка расійскіх дронаў трапіла ў Польшчу праз Брэсцкую вобласць. Варшава заявіла пра “акт агрэсіі”. Паведамлялася пра адну пашкоджаную жылую пабудову. Для нейтралізацыі БПЛА былі задзейнічаныя сілы як Польшчы, так і іншых краін НАТО.

Прэзідэнт Украіны Уладзімір Зяленскі назваў залёт дронаў у Польшчу “крайне небяспечным прэцэдэнтам для Еўропы”.

Прэм’ер-міністр Польшчы Дональд Туск заявіў, што “ўпершыню значная частка дронаў прыбыла напрамую з Беларусі”, — было зафіксавана не менш за 19 парушэнняў паветранай прасторы.

Начальнік Генеральнага штаба — першы намеснік міністра абароны Беларусі Павел Муравейка заявіў, што Мінск абменьваўся інфармацыяй з Польшчай па гэтай сітуацыі і збіў “частку заблуканых беспілотнікаў”.

Варшава пазней пацвердзіла факт узаемадзеяння з беларускім бокам.