Какава-парашок, кава і курсы кіроўцы ў лідарах па падаражанні з пачатку 2025 года без уліку сезонных тавараў
1 лістапада, Позірк. Какава-парашок, натуральная молатая кава і курсы кіроўцы ўвайшлі ў тройку лідараў па падаражанні за 9 месяцаў 2025 года без уліку сезонных тавараў, сведчыць праведзены “Позіркам” аналіз даных Белстата.
Какава-парашок падаражэў на 67,01%, кава — на 31,94%, курсы кіроўцы — на 27,03%.
Акрамя какава-парашку і кавы, у першую пяцёрку харчтавараў, якія найбольш падаражэлі, увайшлі растваральны какава-напой (+26,50%), салёны селядзец (+24,78%) і шакалад (+22,99%).
Патаннелі толькі шліфаваны і паліраваны рыс (-7,49%) і аліўкавы алей (-4,75%).
У першай пяцёрцы паводле падаражання непрадуктовых тавараў: жаночыя зімовыя боты (+22,97%), мужчынскія боты і чаравікі на футры (+20,26%), штодзённыя газеты (+16,78%), штотыднёвыя газеты (+16,11%) і штомесячныя часопісы (+15,51%).
Сярод паслуг, акрамя курсаў кіроўцы, больш за ўсё падаражалі паштовыя паслугі (+23,54%), абыходжанне з цвёрдымі камунальнымі адходамі (+22,93%), білеты ў тэатр (+22,70%) і халоднае водазабеспячэнне (+21,15%). Патаннелі толькі рытуальныя паслугі (-2,99%).
Агулам спажывецкія цэны павялічыліся за 9 месяцаў 2025 года на 5,76%.
Іншыя падрабязнасці даступныя падпісчыкам “Позірк+” (калі спасылка не працуе, карыстайцеся, калі ласка, гэтай)
