Амбразевіч уручыў даверчыя граматы магістру Мальтыйскага Ордэна

17 лістапада, Позірк. Амбасадар Беларусі пры Мальтыйскім Ордэне Юрый Амбразевіч уручыў даверчыя граматы магістру Мальтыйскага Ордэна Джону Данлэпу, паведамляе Міністэрства замежных спраў.

“У ходзе гутаркі бакі абмеркавалі ключавыя аспекты супрацоўніцтва, а таксама абмяняліся думкамі па актуальных пытаннях міжнароднага парадку дня. Асаблівая ўвага нададзена перспектыўным напрамкам далейшага ўзаемадзеяння з акцэнтам на развіццё гуманітарных ініцыятыў, накіраваных на падтрымку сацыяльнага развіцця Беларусі”, — адзначае МЗС.

Паведамляецца, што па выніках цырымоніі “бакі пацвердзілі ўзаемную зацікаўленасць у далейшым пашырэнні канструктыўнага супрацоўніцтва і паглыбленні традыцыйна дружалюбных адносін”.

8 ліпеня стала вядома, што Амбразевіч уручыў копіі даверчых грамат генеральнаму сакратару па замежных справах Мальтыйскага Ордэна Джампаола Канціні.

Амбразевіч быў прызначаны амбасадарам пры Святым Пасадзе 27 сакавіка 2025 года. 22 траўня ён дадаткова атрымаў пасады амбасадара пры Суверэнным ваенным ордэне Гаспітальераў святога Яна Іерусалімскага, Радоса і Мальты, пастаяннага прадстаўніка пры Арганізацыі ААН па харчаванні і сельскай гаспадарцы і іншых міжнародных арганізацыях у Рыме, а таксама пастаяннага прадстаўніка пры ЮНЕСКА. Раней Амбразевіч быў намеснікам міністра замежных спраў.

Пра тое, што Беларусі блізкія прынцыпы міласэрнасці, гуманізму і салідарнасці, якімі “на працягу стагоддзяў кіруецца” Мальтыйскі Ордэн, заявіў Аляксандр Лукашэнка, віншуючы 24 чэрвеня князя і вялікага магістра гэтага дзяржаўнападобнага ўтварэння Джона Данлэпа з Днём св. Яна Хрысціцеля.

Мальтыйскі Ордэн (поўная назва — Суверэнны ваенны Мальтыйскі ордэн Гаспітальераў св. Яна Іерусалімскага, Радоса і Мальты) — найстарэйшы рыцарскі ордэн Рымска-каталіцкага касцёла, які мае прыкметы, уласцівыя суверэнным дзяржавам.

Ордэн з’яўляецца суб’ектам міжнароднага публічнага права (мае статус назіральніка пры ААН і Савеце Еўропы, паўнавартасныя дыпламатычныя адносіны з 113 дзяржавамі). У яго ёсць уласныя органы ўлады (вялікі магістр, урад), дзейнічае свая канстытуцыя, выдаюцца дыпламатычныя пашпарты.

У той жа час у Мальтыйскага Ордэна няма тэрыторыі, як у класічных дзяржаў, хаця ён мае экстэрытарыяльныя правы на некалькі будынкаў у Рыме (там дзейнічае юрысдыкцыя ордэна, а не Італіі). Пры гэтым раней ён паўнавартасна валодаў тэрыторыямі: Іерусалімам — у XI–XIII стст., Радосам — у XIV–XVI стст., Мальтай — у XVI–XVIII стст. Страціў свае апошнія землі ў 1798 годзе.

Ордэн узнік у XI стагоддзі на базе шпіталя св. Яна, які дзейнічаў у Іерусаліме з 1048 года і дапамагаў пілігрымам з розных краін. Пазіцыянуе сябе як адзін з найстарэйшых інстытутаў заходняй і хрысціянскай цывілізацыі і каталіцызму — нейтральны, непрадузяты і апалітычны.

Пасля прэзідэнцкіх выбараў 2020 года адносіны паміж уладамі ў Мінску і Рымска-каталіцкім касцёлам у Беларусі ўскладніліся у сувязі з тым, што многія каталіцкія іерархі і вернікі адкрыта выступілі супраць хвалі гвалту і рэпрэсій, якія рушылі за масавымі пратэстамі. Некаторыя святары прайшлі праз затрыманні, суды і арышты з палітычных прычын, асобныя былі вымушаныя пакінуць Беларусь.

Разам з тым 24 лістапада 2020 года амбасадар Мальтыйскага Ордэна ўручыў даверчыя граматы Лукашэнку.

10 студзеня 2022 года Сяргей Алейнік, які на той момант займаў пасаду намесніка міністра замежных справаў і амбасадара пры Мальтыйскім Ордэне (па сумяшчальніцтве), правёў у Рыме сустрэчу з генеральным сакратаром па міжнародных сувязях ордэна Стэфана Ронка.

У чэрвені 2024 года Лукашэнка запрасіў Данлэпа наведаць Беларусь.

Рэжым Лукашэнкі ўсяляк імкнецца прадэманстраваць нармалізацыю адносін як з касцёлам у Беларусі, так і з сусветным каталіцызмам у цэлым. Беларускія ўлады неаднаразова заяўлялі пра блізкасць пазіцый Мінска і Ватыкана. Шэраг экспертаў мяркуе, што рэжым выкарыстоўвае кантакты са Святым Пасадам для наладжвання дыялогу з Захадам агулам.