Ад пачатку года на аб’ектах АПК пацярпела або знішчана 50 адзінак тэхнікі
18 лістапада, Позірк. За мінулыя дзяжурныя суткі (з 6:00 17 лістапада па 6:00 18 лістапада) на аб’ектах аграпрамысловага комплексу адбылося два пажары, паведамляе Міністэрства па надзвычайных сітуацыях.
Ранкам 17 лістапада на тэрыторыі мехдвара ў Лепелі (Віцебская вобласць) агнём быў пашкоджаны трактар.
Уначы 18 лістапада адбыўся пажар у зернесушыльным комплексе ля аграгарадка Беліца (Лідскі раён Гродзенскай вобласці), у выніку чаго была пашкоджана 1 т зерня кукурузы.
За дзесяць месяцаў было пашкоджана ці знішчана 48 адзінак тэхнікі. З улікам лістападаўскіх здарэнняў (апрача вышэйназванага выпадку 5 лістапада агнём былі пашкоджаны кабіна, маторны адсек, лакафарбавае пакрыццё і колы кормаўборачнага камбайна КВК-800 “Палессе FS80”) іх колькасць павялічылася да 50 (за ўвесь 2024 год — мінімум 73).
За пяць гадоў у Беларусі істотна зменшылася колькасць асноўных відаў тэхнікі, машын і абсталявання ў сельскагаспадарчых арганізацыях, сведчыць праведзены “Позіркам” аналіз даных Нацыянальнага статыстычнага камітэта.
Стала менш камбайнаў: збожжаўборачных — на 14,6% (з 8.798 на канец 2019 года да 7.514 на канец 2024-га), бульбаўборачных — на 32,9% (з 778 да 522), буракаўборачных — на 27,5% (з 298 да 216), кормаўборачных — на 11,6% (з 4.138 да 3.660), ільноўборачных — на 30,1% (з 428 да 299).
Колькасць трактароў у гаспадарках зменшылася на 9,6% (з 38.966 да 35.241), грузавых аўтамабіляў — на 14,8% (з 17.873 да 15.228).
Даільных установак і агрэгатаў стала менш на 15,4% (з 10.758 да 9.096), бульбакапальнікаў — на 35,3% (з 1.254 да 811), бульбасаджалак — на 28% (з 1.198 да 862), зернеачышчальных машын — на 12,7% (з 6.939 да 6.059), зернеачышчальна-сушыльных комплексаў — на 19,6% (з 2.559 да 2.057).
