На праграму развіцця раёнаў Прыпяцкага Палесся не хапае 400 млн рублёў — Лукашэнка

18 лістапада, Позірк. На праграму развіцця раёнаў Прыпяцкага Палесся не хапае каля 400 млн рублёў, ці 6% агульнага аб’ёму выдзеленых сродкаў (6,5 млрд рублёў), заявіў Аляксандр Лукашэнка на нарадзе 18 лістапада.

“Нагадаю, што гэта праграма — адно з ключавых перадвыбарных абяцанняў прэзідэнта палешукам, — цытуе палітыка яго прэс-служба. — Выбары адбыліся даўно. Гэта не значыць, што мы там нічога не рабілі. Вельмі шмат зроблена. Але гэта толькі маленькія першыя крокі. Працы мора”.

Паводле яго слоў, праграма да 2030 года ахоплівае 9 раёнаў, дзе жывуць 350 тыс. чалавек. “Мы павінны ведаць і разумець, якія трэба правесці мерапрыемствы ў рамках праграмы і па-за ёй, каб палешукі заўважылі, ды і ўся Беларусь, што мы сур’ёзна займаемся Палессем. Мы заўсёды мусім памятаць, а ці маем на гэта грошы для таго, каб гэтыя мерапрыемствы ажыццявіць”, — заявіў Лукашэнка, адзначыўшы, што “ўсё мае быць дакладна пралічана і выверана”.

“Мы павінны бачыць мэту, паставіць перад сабой пэўныя задачы і дзейнічаць на вынік. Пра гэта я вас папярэджваў. Як мне дакладваюць, у цэлым вы іх аптымізавалі. Аднак па-ранейшаму яны не забяспечаныя ў поўным аб’ёме грашыма. І фінансавы разрыў досыць вялікі”, — дадаў спікер.

Куратарам праграмы ён прызначыў “сапраўднага палешука” Міхаіла Русага — упаўнаважанага па Брэсцкай вобласці, старшыню пастаяннай камісіі Савета Рэспублікі па заканадаўстве і дзяржаўным будаўніцтве.

“Прырода унікальная, своеасаблівая. У свеце нідзе прыроды такой няма. І глебы вельмі своеасаблівыя. І я б не сказаў, калі ў цэлым узяць, што яны багатыя. Пясчаныя глебы ў асноўным. Але калі па розуме, то і на іх можна атрымліваць адпаведныя ўраджаі”, — упэўнены Лукашэнка.

На яго думку, маецца ў рэгіёне і турыстычны патэнцыял, які “наогул не раскрыты” — “ад нацпарка да аграсядзібаў”. “А гэта добрыя грошы. Нам трэба самім гэтым займацца. Недзе нешта будаваць. Бо для турыстаў сёння важныя не палацавыя гэтыя інтэр’еры. Ім хочацца нешта з дрэва, прыехаць адпачыць з дзеткамі. А гэта мы ўмеем рабіць. Мы для гэтага маем усё. І рабіць гэта трэба не тое што хутка, а імгненна. Таму што гэтая залатая жыла сыходзіць”, — заявіў палітык.

Прыпяцкае Палессе — фізіка-геаграфічны рэгіён, які ахоплівае ўсходнюю частку Брэсцкай, заходнюю частку Гомельскай, паўднёвую частку Мінскай і паўднёва-заходнюю частку Магілёўскай абласцей.