Ціханоўская: Будучыня патрабуе дакладнага плану пераменаў

18 лістапада, Позірк. Будучыня беларускай эканомікі патрабуе дакладнага і адказнага плану пераменаў, заявіла дэмакратычны лідар Святлана Ціханоўская 18 лістапада на саміце “Эканоміка адкрытых вачэй” (Кракаў, Польшча), паведаміла яе прэс-служба.

“Як дэмакратычныя сілы мы ўжо маем план з пяці крокаў па аднаўленні нашай эканомікі і аднаўленні незалежнасці Беларусі”, — сказала яна.

Па-першае, гэта рэальныя эканамічныя рэформы: “Мы павінны мадэрнізаваць нашу эканоміку, правесці прыватызацыю, абараняючы пры гэтым працоўныя месцы людзей, і даць малому бізнесу прастору для росту. Нам трэба ачысціць сістэму ад карупцыі, стварыць незалежныя суды і абараняць кожнага інвестара”.

Паводле палітыка, Беларусь павінна вярнуць сабе доступ да міжнародных фінансавых арганізацыяў і падтрымліваць прыватныя кампаніі, дыверсіфікаваць гандаль і прыняць еўрапейскія правілы і стандарты вядзення бізнесу.

“Беларусь павінна скараціць сваю залежнасць ад расійскай энергіі. Мы павінны падключыцца да еўрапейскіх энергетычных сетак і развіваць аднаўляльную энергетыку”, — дадала Ціханоўская.

Паводле дэмлідара, неабходна “пабудаваць сучасную лічбавую дзяржаву, дзе кампаніі рэгіструюцца за хвіліны, дзяржаўныя паслугі даступныя анлайн, а для карупцыі няма месца”.