Літоўская апазіцыя мае намер абмеркаваць з прэм’ерам Ругінене сітуацыю з фурамі, якія застаюцца на беларускай тэрыторыі

21 лістапада, Позірк. Мяжа з Беларуссю адкрыта, аднак літоўскія фуры “ўсё яшчэ захраслі там і не могуць вярнуцца”, заявіў на сваёй старонцы ў “Фэйсбуку” лідар Саюза Айчыны — Хрысціянскіх дэмакратаў Літвы (СА–ХДЛ) Лаўрынас Кашчунас.

“Метеазонды працягваюць парушаць працу аэрапорта, кантрабандысты сваволяць. Крызіс і хаос працягваюцца”, — лічыць палітык.

На яго думку, шэраг літоўскіх чыноўнікаў — кіраўнікі МЗС, МУС і Мінфіна — “належным чынам не выконваюць сваю працу”, а ўрад не каардынуе іх дзейнасць.

У гэтай сувязі, паведаміў Кашчунас, парламенцкая апазіцыя вырашыла выклікаць на сумеснае пасяджэнне прэм’ер-міністра Інгу Ругінене, каб высветліць, ці існуе “план выхаду з гэтага крызісу”. “Мы таксама прадставім свае прапановы”, — падкрэсліў Кашчунас.

Раней паведамлялася, што грузавікі літоўскіх перавозчыкаў застаюцца ў Беларусі, хоць пункты пропуску з боку Літвы аднавілі працу. Паводле інфармацыі прэс-сакратара Службы аховы дзяржаўнай мяжы Гедруса Мішуціса, да ранку 21 лістапада ніводны грузавы аўтамабіль з літоўскімі нумарамі не ўехаў у краіну.

“Нічога не змянілася, і прычын, чаму літоўскія фуры не рухаюцца, мы пакуль не бачым”, — сказаў прадстаўнік памежнага ведамства.

20 лістапада прэс-сакратар МЗС Беларусі Руслан Варанкоў заявіў, што Мінск прапануе правесці кансультацыі паміж беларускім і літоўскім знешнепалітычнымі ведамствамі — для распрацоўкі “ўстойлівага механізму працы пунктаў пропуску і недапушчэння іх закрыцця ў будучыні”. “Беларусі і Літве патрэбная мяжа, якая аб’ядноўвае, а не падзяляе. Цяпер усё залежыць ад рашэнняў Вільніюса”, — сказаў прадстаўнік МЗС.

Пункты пропуску Мядзінінкай і Шальчынінкай на літоўска-беларускай мяжы аднавілі працу апоўначы 20 лістапада (1:00 па мінскім часе).

Вільнюс закрыў памежныя пераходы напрыканцы кастрычніка, дамагаючыся такім чынам рэакцыі Мінска на масавыя прылёты з Беларусі паветраных шароў з кантрабандай, якія перашкаджалі ў тым ліку грамадзянскай авіяцыі Літвы.

Пры гэтым пасля адкрыцця мяжы зафіксаваны новы інцыдэнт, праз які часова закрываўся аэрапорт Вільнюса.