Вільнюс уручыў Беларусі ноту пратэсту ў сувязі з “дыскрымінацыйнымі дзеяннямі ў дачыненні да літоўскіх перавозчыкаў”
21 лістапада, Позірк. Нота пратэсту ўручана 21 лістапада прадстаўніку амбасады Беларусі ў сувязі з “дыскрымінацыйнымі дзеяннямі ў дачыненні да літоўскіх перавозчыкаў”, паведамляе Міністэрства замежных спраў балтыйскай дзяржавы.
Адзначаецца, што афіцыйны Вільнюс расцэньвае “наўмысны нявыпуск” з тэрыторыі Беларусі цягачоў, прычэпаў і паўпрычэпаў, якія належаць літоўскім кампаніям і грамадзянам, як “наўмыснае забіранне маёмасці і грубае парушэнне агульнапрызнаных нормаў міжнароднага права”.
МЗС Літвы “настойліва запатрабаваў” ад уладаў у Мінску “неадкладна спыніць названыя дыскрымінацыйныя дзеянні і папярэдзіў, што ў адваротным выпадку Літва пакідае за сабой права звярнуцца ў суд з адпаведным пазовам, запатрабаваць кампенсацыі нанесенай шкоды і прыняць іншыя меры ў адказ як на нацыянальным узроўні, так і на ўзроўні Еўрасаюза”.
Раней паведамлялася, што грузавікі літоўскіх перавозчыкаў застаюцца ў Беларусі, хоць пункты пропуску з боку Літвы аднавілі працу. Паводле інфармацыі прэс-сакратара Службы аховы дзяржаўнай мяжы Гедруса Мішуціса, да раніцы 21 лістапада ні адзін грузавы аўтамабіль з літоўскімі нумарамі так і не ўехаў у краіну.
“Нічога не змянілася, і прычын, па якіх літоўскія машыны не рухаюцца, мы пакуль не бачым”, — сказаў прадстаўнік памежнага ведамства.
20 лістапада прэс-сакратар МЗС Беларусі Руслан Варанкоў заявіў, што міністэрства прапануе правесці кансультацыі паміж беларускім і літоўскім знешнепалітычнымі ведамствамі — для выпрацоўкі “ўстойлівага механізму працы пунктаў пропуску і недапушчэння іх закрыцця ў будучыні”. “Беларусі і Літве патрэбна мяжа, якая аб’ядноўвае, а не падзяляе. Цяпер усё залежыць ад рашэнняў Вільнюса”, — сказаў прадстаўнік МЗС.
Пункты пропуску Мядзінінкай і Шальчынінкай на літоўска-беларускай мяжы аднавілі працу апоўначы 20 лістапада (у 1:00 паводле мінскага часу).
Вільнюс закрыў памежныя пераходы ў канцы кастрычніка, дамагаючыся такім чынам рэакцыі Мінска на масавыя прылёты з Беларусі паветраных шароў з кантрабандай, якія перашкаджалі ў тым ліку грамадзянскай авіяцыі Літвы. У сувязі з гэтай сітуацыяй літоўскі бок уручыў Мінску дзве ноты пратэсту. У другой ноце было заяўлена, што Вільнюс “расцэньвае гэтыя інцыдэнты як свядомую правакацыю і эскалацыю напружанасці”.
У адказ МЗС Беларусі ўручыў ноту пратэсту Літве “ў сувязі з чарговым аднабаковым закрыццём мяжы, якое зроблена без якога-небудзь папярэдняга апавяшчэння”.
20 лістапада, ужо пасля адкрыцця мяжы, быў зафіксаваны новы інцыдэнт, праз які часова закрываўся аэрапорт Вільнюса.
Гл. таксама:
Прэм’ер Літвы не выключыла паўторнага закрыцця мяжы з Беларуссю
