Ціханоўская: У нашых інтарэсах, каб за стол перамоваў па Ўкраіне трапіў ЕС

24 лістапада, Позірк. “Калі мы кажам пра цяперашні фармат міру, які ўключае ў сабе ЗША і Ўкраіну, то <…> я не думаю, што [беларускія] дэмакратычныя сілы могуць патрапіць у перамоўны працэс”, — заявіла дэмакратычны лідар Святлана Ціханоўская на брыфінгу ў Варшаве 24 лістапада.

“Але ў нашых інтарэсах, каб за стол перамоваў патрапіў Еўразвяз”, — дадала яна.

ЕС, на думку палітыка, у такім выпадку будзе адстойвауь інтарэсы дэмакратычнай Беларусі, бо “гэта і іх патрэба — каб Беларусь стала незалежнай ад расійскага ўплыву”. 

“Голас Беларусі можа быць чутны. Год таму мы не маглі сабе ўявіць, што, як на дадзены момант, Еўразвяз не з’яўляецца непасрэдным удзельнікам перамоў [па Ўкраіне]”, — адзначыла Ціханоўская.

Дэмсілы сочаць за перамоўным працэсам па Ўкраіне, сказала Ціханоўская: “Свае пазіцыі мы ўжо перадалі найбліжэйшым саюзнікам [у ЕС]. Важна, каб па выніках любых дамоўленасцяў Беларусь не засталася пад кантролем Расіі”.