У сістэме Мінжылкамгаса выяўленыя парушэнні пры разглядзе зваротаў — пракуратура

26 лістапада, Позірк. Факты, калі ў сістэме Міністэрства жыллёва-камунальнай гаспадаркі парушаўся працэс разгляду зваротаў, выявіла ў выніку праверкі Генеральная пракуратура.

Прэс-служба нагляднага органа паведаміла, што арганізацыі сістэмы Мінжылкамгаса ў першай палове 2025 года атрымалі 25.078 зваротаў (за першае паўгоддзе 2024-га — 25.064; +1%). За ўвесь 2024 іх было 54.610, 2023 — 50.490.

Пракуратура выявіла факты, калі парадак і тэрміны разгляду зваротаў не выконваліся, не рабіліся “вычарпальныя захады” для падвышэння якасці працы са зваротамі, на месцах не вырашаліся “актуальныя пытанні і праблемы жыццядзейнасці насельніцтва”.

Адзначаецца, што ў сферы ЖКГ актуальныя тэмы рамонту і эксплуатацыі жыллёвага фонду, добраўпарадкавання населеных пунктаў і аплаты камунальных паслуг.

Паводле інфармацыі ведамства, “выкрытыя недахопы” пры ўнясенні даных у агульную сістэму ўліку і апрацоўкі зваротаў, якія тычацца звестак пра накіраваныя заяўнікам адказы і прынятыя рашэнні.

Намеснік генпракурора запатрабаваў ад міністра жыллёва-камунальнай гаспадаркі выправіць парушэнні. Сцвярджаецца, што ў міністэрстве пасля гэтага быў зроблены “шэраг канкрэтных арганізацыйна-практычных захадаў”, вінаватых службовых асоб прыцягнулі да дысцыплінарнай адказнасці.