Ля закінутага дома ў літоўскім прыграніччы знойдзена кантрабанда з Беларусі, уладальніка затрымалі п’яным за стырном

26 лістапада, Позірк. Тры мяхі з цыгарэтамі NZ Gold з беларускімі акцызнымі маркамі знайшлі 22 лістапада літоўскія памежнікі ў двары закінутага дома ў вёсцы Канюкай (Шальчынінскі раён, побач з беларускай мяжой).

Паводле інфармацыі Службы аховы дзяржаўнай мяжы (САДМ), кошт 2.100 пачкаў з тытунёвай прадукцыяй, што знаходзіліся ў тых мяхах, з улікам усіх абавязковых падаткаў складае 10,9 тыс. еўра.

Непадалёк ад месца выяўлення кантрабанднага тавару памежнікі спынілі для праверкі аўтамабіль “Вольва”, кіроўца якога быў п’яны — праверка паказала 1,31 праміле (лёгкая ступень ап’янення). 46-гадовы мужчына — пазбаўлены правоў кіроўцы мясцовы жыхар, які ездзіў на аўтамабілі без страхоўкі і рэгістрацыі, — “не адмаўляў”, што знойдзеныя цыгарэты належаць яму.

Па факце “незаконнага распараджэння падакцызнымі таварамі” распачатае дасудовае расследаванне. За такое дзеянне прадугледжаны штраф або пазбаўленне волі на тэрмін да 4 гадоў.

Мужчыну спачатку затрымалі, але пасля допыту адпусцілі, абраўшы ў якасці меры стрымання “інтэнсіўны нагляд”.

Акрамя таго, у дачыненні да яго складзеныя два адміністрацыйныя пратаколы — за “паўторнае кіраванне аўтамабілем пасля пазбаўлення правоў” (пагражае штраф у памеры 1.100–1.500 еўра) і “парушэнне патрабавання да транспартнага сродку для ўдзелу ў дарожным руху” (50–120 еўра).

Аўтамабіль і нелегальныя цыгарэты захоўваюцца ў Варэнскім пагранічным атрадзе.