Ціханоўская: Фінляндыя выдзеліць яшчэ 100 тыс. еўра на дапамогу пацярпелым ад рэпрэсій
23 верасня, Позірк. Фінляндыя выдзеліць дадатковыя 100 тыс. еўра на дапамогу беларусам, якія пацярпелі ад рэпрэсій. Пра гэта паведаміла прэс-служба дэмакратычнага лідара Святланы Ціханоўскай па выніках яе сустрэч у Нью-Ёрку (ЗША) з міністрам замежных спраў Фінляндыі Элінай Валтонен і палітычным дзяржаўным сакратаром МЗС Пасі Раяла.
Сродкі накіруюць праз Міжнародны гуманітарны фонд і беларускія праваабарончыя арганізацыі, якія дапамагаюць палітвязням і іх сем’ям.
Адзначаецца, што гэта ўжо другі ўнёсак Фінляндыі ў фонд, які аказвае пацярпелым ад рэпрэсій фінансавую, прававую, псіхалагічную і іншую дапамогу.
“Дзякуй Фінляндыі за паслядоўную салідарнасць з беларусамі. Асабліва важна, што гэтая падтрымка ператвараецца ў канкрэтную дапамогу людзям — палітвязням, вызваленым і сем’ям рэпрэсаваных”, — заявіла Ціханоўская.
Паводле яе слоў, неабходна загадзя рыхтавацца да новых вызваленняў палітвязняў, каб людзі адразу пасля выхаду з турмы маглі атрымаць падтрымку.
Паведамляецца, што падчас сустрэч таксама абмяркоўваліся далейшыя намаганні па вызваленні палітвязняў, сітуацыя з бяспекай у Беларусі і рызыкі далейшага ўключэння краіны ў расійскую вайну супраць Украіны.
Асобна Ціханоўская ўзняла праблемы беларусаў, якія жывуць у Фінляндыі, у тым ліку пытанні пратэрмінаваных пашпартоў, дакументаў і легалізацыі.
21 верасня Ціханоўская выступіла ў Нью-Ёрку на мерапрыемстве “Беларусь: саўдзельніца вайны Расіі супраць Украіны і пагроза міжнароднай бяспецы” на палях тыдня высокага ўзроўню 81-й сесіі Генеральнай Асамблеі ААН.
Акрамя Валтанен і Раяла, яна таксама пагаварыла з вярхоўным прадстаўніком Еўрапейскага саюза па замежных справах і палітыцы бяспекі Каяй Калас, міністрам замежных спраў Эстоніі Маргусам Цахкнам, прэзідэнтам Чэхіі Пятром Паўлам, міністрам замежных спраў Літвы Кястуцісам Будрысам, міністрам замежных спраў Нарвегіі Эспенам Бартам Эйдэ, сенатарам ЗША Джын Шахін, генеральным сакратаром Савета Еўропы Аленам Берсе.
Паводле слоў Ціханоўскай, кантакты з замежнымі партнёрамі паказалі “адзінства сярод краін у пытаннях Беларусі”: “Гэта вельмі важна. Вельмі важна адрозніваць беларусаў ад рэжыму [Лукашэнкі], а Беларусь — ад Расіі. Ізалюючы рэжым, важна не ізаляваць беларусаў. І я бачу, што гэта добра разумеюць”.
Акрамя гэтага, Ціханоўская ў Нью-Ёрку ўручыла медаль Францыска Скарыны беларускаму спеваку і журналісту Багдану Андрусішыну (Данчык), які пражывае ў ЗША.
Нью-Ёрк наведвае таксама міністр замежных спраў Беларусі Максім Рыжанкоў, які, паводле інфармацыі прэс-службы МЗС, на палях сесіі ГА ААН сустрэўся з міністрам замежных спраў Польшчы Радаславам Сікорскім, а таксама калегамі з Батсваны, Ірана, Нікарагуа, Манголіі, Славакіі, Судана і Танзаніі і правёў кароткія гутаркі з кіраўнікамі МЗС Зімбабвэ, Інданезіі, Лаоса, Тога і краін СНД.
