У Віцебскай вобласці расце нарказлачыннасць — даныя пракуратуры

2 снежня, Позірк. За 10 месяцаў 2025 года на тэрыторыі Віцебскай вобласці выяўлена 326 злачынстваў, звязаных з незаконным абаротам наркотыкаў, — на 0,9% больш, чым за аналагічны леташні перыяд (323), паведамляе пракуратура рэгіёна.

159 злачынстваў звязана са збытам наркотыкаў (+3,9%, 153).

На ўліку ў органах аховы здароўя знаходзяцца 801 нарказалежны, 408 з іх — на дыспансерным уліку.

За названы перыяд у вобласці зарэгістравана 24 (33, -27,3%) злачынствы, прадугледжаных артыкуламі 166–167 Крымінальнага кодэкса (згвалтаванне і гвалтоўныя дзеянні сексуальнага характару), пацярпелым прызнаны 21 (43, -51,2%) непаўналетні.

2 снежня пракурор Віцебскай вобласці Андрэй Скурат на пасяджэнні аблвыканкама адзначыў неабходнасць забеспячэння эфектыўнай работы па прафілактыцы ўжывання наркатычных сродкаў, папярэджанні сямейных праблем, недапушчэнні пражывання дзяцей у нядобранадзейных сем’ях.

Паводле слоў Скурата, у асобных рэгіёнах пракурорамі выяўляюцца “факты адсутнасці належнага ўзаемадзеяння органаў унутраных спраў, устаноў аховы здароўя і іншых дзяржаўных органаў, што патрабуе змянення падыходаў да працы, выпрацоўкі дадатковых мер па належнай арганізацыі сумеснай дзейнасці названых суб’ектаў”.

Раней паведамлялася, што за першыя шэсць месяцаў 2025 года колькасць асуджаных паводле “антынаркатычных” артыкулаў Крымінальнага кодэкса (327–332) павялічылася на 2,9% у параўнанні з адпаведным леташнім перыядам.

У студзені — чэрвені за здзяйсненне злачынстваў, звязаных з незаконным абаротам наркотыкаў, асуджана 1.092 чалавекі, за першую палову 2024-га — 1.061.

У Беларусі за першыя шэсць месяцаў 2025 года ў параўнанні з аналагічным перыядам 2024-га колькасць непаўналетніх, якія пацярпелі ад палавых злачынстваў, “нязначна, але знізілася”, заявіў у інтэрв’ю дзяржСМІ начальнік аддзела метадычнага забеспячэння папярэдняга расследавання цэнтральнага апарата Следчага камітэта Юрый Вараўка.

Паводле яго слоў, агульная колькасць пацярпелых за мінулае паўгоддзе склала 380. Статыстыку за аналагічны перыяд мінулага года прадстаўнік СК не прывёў, аднак, як паказаў праведзены “Позіркам” аналіз адкрытых даных міліцэйскіх крыніц, пацярпела 382 непаўналетніх. Такім чынам, іх стала менш на 2, ці на 0,5%.