У Мінскім раёне прыпыненае прыватнае прадпрыемства па мясаперапрацоўцы — КДК знайшоў бруд і невядомую сыравіну

4 снежня, Позірк. Дзейнасць прыватнага мясаперапрацоўчага прадпрыемства ў Мінскім раёне прыпыненая за “невыкананне патрабаванняў заканадаўства”, паведаміла 4 снежня прэс-служба Камітэта дзяржаўнага кантролю, не называючы арганізацыю.

Паводле інфармацыі ведамства, грубыя парушэнні абласное ўпраўленне КДК выявіла разам з “прадстаўнікамі пракуратуры і ветэрынарнай службы рэгіёну”.

“Правяральшчыкі высветлілі, што на тэрыторыі аб’екта не падтрымлівалася чысціня; не праводзілася своечасовая мыйка і дэзінфекцыя інвентара; асобныя работнікі, якія ўдзельнічалі ў вытворчасці прадукцыі, своечасова не прайшлі гігіенічнае навучанне ды інш. Больш за тое, у халадзільных камерах і вытворчым памяшканні знойдзена каля 1 тоны абязлічанай мясной прадукцыі і сыравіны для яе вытворчасці”, — гаворыцца ў паведамленні.

Сабраныя матэрыялы накіраваныя ў Дэпартамент ветэрынарнага і харчовага нагляду Мінсельгасхарча. Прадпрыемства вырашана выключыць з рэестра вытворчых аб’ектаў.

Акрамя таго, згодна з паведамленнем, “разглядаецца пытанне аб прыцягненні прыватнага прадпрыемства да адміністрацыйнай адказнасці”.