У групу “сяброў дэмакратычнай Беларусі” ўваходзіць больш за палову дзяржаў АБСЕ
5 снежня, Позірк. 30 з 57 дзяржаў — членаў Арганізацыі па бяспецы і супрацоўніцтве ў Еўропе (АБСЕ), уключаючы амаль усе краіны ЕС, Нарвегію, Вялікабрытанію, Канаду, Украіну і ЗША — уваходзяць на сёння ў дзеючую ў яе рамках АБСЕ групу “сяброў дэмакратычнай Беларусі”.
Пра гэта паведаміў “Позірку” галоўны дарадца беларускага дэмакратычнага лідара Франак Вячорка па выніках арганізаванага згаданай групай 4 снежня ў Вене мерапрыемства “Падрыхтоўка да дэмакратычнай будучыні Беларусі” на палях 32-га пасяджэння Савета міністраў замежных спраў краін — удзельніц АБСЕ. На мерапрыемстве выступіла Святлана Ціханоўская.
Паводле слоў Вячоркі, акрамя яе, у Вене выступілі намеснікі міністраў замежных спраў Літвы, Эстоніі, Чэхіі, амбасадары дзяржаў АБСЕ, дзяржсакратары Іспаніі і Канады. Усяго на палях пасяджэння, якое праходзіць 4–5 снежня, арганізаваныя два мерапрыемствы, другое прысвечана Украіне.
Вячорка адзначыў, што падчас асноўнай сесіі 4 снежня міністры і прадстаўнікі многіх краін выказаліся ў падтрымку дэмакратычнай Беларусі і з асуджэннем дзеянняў Мінска.
У прыватнасці, вярхоўны прадстаўнік Еўрасаюза па замежных справах і палітыцы бяспекі Кая Калас асудзіла падтрымку рэжымам Аляксандра Лукашэнкі расійскай агрэсіі ва Украіне і рэпрэсіі ў Беларусі; міністр замежных спраў Нарвегіі вітаў удзел Ціханоўскай у мерапрыемстве і заклікаў працягваць падтрымку дэмакратычных сіл; міністр замежных спраў Люксембурга асудзіў галасаванне Беларусі ў ААН супраць рэзалюцыі па вяртанні ўкраінскіх дзяцей і адзначыў важнасць вызвалення Сяргея Ціханоўскага і ўсіх палітвязняў. Літва асудзіла гібрыдныя атакі Мінска і падкрэсліла неабходнасць падтрымкі дэмсілаў.
Паводле інфармацыі Вячоркі, на палях сустрэчы Ціханоўская сустрэлася з міністрамі замежных спраў Люксембурга, Фінляндыі, Германіі, Нарвегіі, Нідэрландаў, Арменіі, а таксама са старшынёй і генеральным сакратаром АБСЕ.
Афіцыйны Мінск на мерапрыемстве прадстаўляе намеснік міністра замежных спраў Ігар Сакрэта.
