32-гадовы беларус затрыманы ў Польшчы за кантрабанду цыгарэт з дапамогай метэазондаў

5 снежня, Позірк. 38-гадовы грамадзянін Польшчы і 32-гадовы грамадзянін Беларусі затрыманыя за кантрабанду цыгарэт з дапамогай паветраных шароў, паведамляе польская памежная служба.

Адзначаецца, што супрацоўнікі ведамства выявілі партыю цыгарэт з беларускімі акцызнымі маркамі ў багажніку аўтамабіля, спыненага паблізу Бяла-Падляскі.

Кошт тытунёвай прадукцыі складае больш за 100 тыс. злотых (больш за 27,5 тыс. долараў).

Затрыманым прад’яўленыя абвінавачванні ў кантрабандзе і “незаконным выкарыстанні паветранага судна з парушэннем дзеючых авіяцыйных правілаў”, гаворыцца ў паведамленні. Падкрэсліваецца, што такія парушэнні караюцца штрафам і пазбаўленнем волі да 5 гадоў.

Акрамя таго, беларусу загадана пакінуць Польшчу з забаронай на ўезд у краіны Шэнгенскага пагаднення на 5 гадоў.

Паведамляецца, што з пачатку года Надбужанскі памежны атрад зафіксаваў ужо больш за 50 выпадкаў, звязаных з нелегальным перамяшчэннем акцызных тавараў праз мяжу з дапамогай метэаралагічных шароў. Ацэначны кошт канфіскаваных такім чынам цыгарэт склаў амаль 1 млн злотых (амаль 275 тыс. долараў).