11 снежня, Позірк. Спробу ўвесці ў Беларусь з Польшчы дзіцячае харчаванне коштам 2 млн рублёў спыніла Брэсцкая мытня, паведамляе прэс-служба Дзяржаўнага мытнага камітэта.
Згодна з дакументамі, грузавы аўтамабіль DAF, які прыбыў у пункт пропуску Казловічы (з польскага боку — Кукурыкі), транспартаваў партыю дзіцячага харчавання на суму каля 294 тыс. рублёў.
Падчас надгляду грузавіка высветлілася, што груз каштуе значна больш. Сцвярджаецца, што польскі перавозчык, “спрабуючы ўвезці падобныя знешне, але розныя паводле кошту тавары”, меў намер ашчадзіць на мытных плацяжах больш за 100 тыс. рублёў.
Па факце недэкларавання тавараў Брэсцкая мытня распачала адміністрацыйны працэс паводле ч. 1 арт. 15.5 КаАП. Гэты артыкул прадугледжвае пакаранне ў выглядзе штрафу ў памеры да 30% кошту прадмета адміністрацыйнага правапарушэння.
