Сутыкненне з аўтобусам у Мінску — пацярпелі фельчары і кіроўца хуткай дапамогі
17 снежня, Позірк. Тры чалавекі пацярпелі ў выніку сутыкнення ранкам 17 снежня ў Мінску аўтамабіля хуткай дапамогі маркі “Сітраен” і аўтобуса МАЗ, вынікае з інфармацыі сталічнай Дзяржаўтаінспекцыі.
Аварыя адбылася на праспекце Дзяржынскага, паблізу да будынка № 56 па вул. Гурскага. Аўтамабіль хуткай дапамогі і аўтобус ехалі ў адным кірунку. Паводле папярэдняй інфармацыі, сутыкненне адбылося з тае прычыны, што кіроўца хуткай не датрымліваўся бяспечнай дыстанцыі.
“Кіроўца і два фельчары аўтамабіля “Сітраен” дастаўленыя ва ўстанову аховы здароўя для абследавання. На момант сутыкнення транспартаванне пацыента не ажыццяўлялася”, — заявіла ДАІ.
Служба нагадала, што кіроўца “абавязаны датрымлівацца такой дыстанцыі да транспартнага сродку, які рухаецца наперадзе, якая дазволіла б пазбегнуць сутыкнення ў выпадку экстранага тармажэння або прыпынення”.
