17 снежня, Позірк. Міністэрства ўнутраных спраў прызнала “экстрэмісцкім фарміраваннем” “групу грамадзян, якія дзейнічаюць з 2020 года сумесна і ўзгоднена, аб’яднаных пад агульнай назвай “Барысфен”, якая, паводле версіі ведамства, “ажыццяўляе экстрэмісцкую дзейнасць”.
Паводле версіі ведамства, адносіны да фарміравання маюць Павел Станкевіч, а таксама Павел Лішанкоў і Дзмітрый Далячка, вынікае з запісу, які з’явіўся ў адпаведным пераліку на сайце МУС 17 снежня — у дзень прыняцця рашэння.
Да “экстрэмісцкіх” прылічаны тыя, што маюць дачыненне да “Барысфена” і яго кіраўніка старонкі ў сацсетках “Фэйсбук” і “Укантакце”, а таксама “лагатып у выглядзе палатна чырвонага колеру з намаляваным на ім кулаком з мячом белага колеру, у верхняй частцы якога змешчаны надпіс “БАРЫСФЕН” et dignitas“.
У лістападзе згаданыя старонкі ў сацсетках былі прызнаныя міністэрствам інфармацыі “экстрэмісцкімі матэрыяламі”, а ў пачатку снежня Станкевіч выйшаў на волю пасля 30 сутак арышту.
Станкевіч зноў затрыманы паводле адміністрацыйнага артыкула, паведамляе праваабарончы праект “MAYDAY.TEAM“.
Ён знаходзіцца ў Магілёўскім ІЧУ.
Паводле інфармацыі на сайце Магілёўскага гарадскога цэнтра культуры і вольнага часу, на яго базе дзейнічае народны калектыў рыцарскай сярэднявечнай культуры “Барысфен”, якім кіруе Станкевіч.
Адзначаецца, што калектыў створаны ў 1998 годзе.
“Асноўныя напрамкі клуба: вывучэнне гісторыі беларускага сярэднявечча, культуры, побыту, рэканструкцыя адзення, даспехаў, дэманстрацыя элементаў сярэднявечнай харэаграфіі, пастаноўка турніраў”, — гаворыцца на сайце дзяржустановы.
Цяпер у “пераліку арганізацый, фарміраванняў, індывідуальных прадпрымальнікаў, якія маюць дачыненне да экстрэмісцкай дзейнасці”, які сумесна вядуць МУС і КДБ, 323 пазіцыі.
