У Гомелі ў кватэры шматпавярховага дома ўзарваўся газ

17 снежня, Позірк. Аб выбуху газу ў адной з кватэр шматпавярховага жылога дома ў Гомелі на вул. Косарава (Савецкі раён) паведаміла прэс-служба Міністэрства па надзвычайных сітуацыях.

“Паводле папярэдняй інфармацыі, адбылася ўспышка газапаветранай сумесі без наступнага гарэння на сёмым паверсе”, — гаворыцца ў рэлізе.

У выніку здарэння “адбылося абвальванне пліт перакрыццяў вышэй-і ніжэйшых кватэр”. Ратавальнікі эвакуіравалі дзевяць чалавек.

Паводле слоў начальніка абласнога ўпраўлення МНС Сяргея Дзічкоўскага, на месцы працуе камісія па надзвычайных сітуацыях: “Усім жыхарам, якія маюць патрэбу ў пражыванні на сённяшні дзень, прадастаўлены гасцініцы, месцы з харчаваннем. Кіруе непасрэдна мерапрыемствамі па эвакуацыі старшыня Гомельскага гарадскога выканаўчага камітэта”.

Галоўнай задачай цяпер ён назваў “умацаванне канструкцыі вонкавых сцен будынка жылога дома і разбор канструкцый унутры”.