20 снежня, Позірк. Старшынёй Апеляцыйнага эканамічнага суда прызначаны Юрый Кобец, якога Усебеларускі народны сход вызваліў ад пасады намесніка старшыні Вярхоўнага суда. Адпаведны ўказ “Аб прызначэнні і вызваленні суддзяў” Аляксандр Лукашэнка падпісаў 20 снежня.
Паводле інфармацыі прэс-службы палітыка, у адпаведнасці з гэтым жа дакументам пасаду старшыні эканамічнага суда Гомельскай вобласці цяпер займае Аляксандр Лісоўскі, Гродзенскай вобласці — Эдуард Кароль.
“Акрамя таго, шэраг суддзяў вызвалены ад пасадаў у сувязі з абраннем іх суддзямі Вярхоўнага суда”, — гаворыцца ў паведамленні.
Пра тое, што Кобец узначаліць Апеляцыйны эканамічны суд, стала вядома каля двух месяцаў таму. 27 кастрычніка Лукашэнка падпісаў указ пра склад гэтага органа, у які ўвайшло 27 суддзяў. На Кобеца было ўскладзенае “ажыццяўленне паўнамоцтваў старшыні”.
Указ пра стварэнне Апеляцыйнага эканамічнага суда быў падпісаны 3 красавіка 2025 года. Будынак у Мінску адкрыўся 3 снежня. Пачне працаваць суд 1 студзеня 2026 года, калі набудзе моц Кодэкс грамадзянскага судаводства.
