Банкаўскі працэсінгавы цэнтр абяцае хуткім часам выправіць праблемы з балансамі на картах “Беларусбанка”

31 снежня, Позірк. Банкаўскі працэсінгавы цэнтр (БПЦ) “працягвае мерапрыемствы па ўрэгуляванні рэшткаў па картках ААТ “ААБ Беларусбанк”, паведамляе прэс-служба арганізацыі.

“У найбліжэйшы час балансы па картках будуць урэгуляваныя ў поўным аб’ёме”, — заявіў аператар тэхнічнай і інфармацыйнай апрацоўкі безнаяўных плацяжоў.

Напярэдадні БПЦ паведаміў, што ў апаратна-праграмным комплексе адбыўся тэхнічны збой, і папярэдзіў пра тое, што могуць быць “некарэктныя балансы” па картках “Беларусбанка”.

Ранкам 31 снежня цэнтр заявіў, што тэхнічны збой “паспяхова ліквідаваны”, а “ўсе балансы па картках” згаданага банка “прыведзеныя ў актуальны стан”. Пры гэтым было адзначана, што “аперацыі з выкарыстаннем картак ажыццяўляюцца ў штатным рэжыме”.