Падлетак без правоў катаў аднагодка на прывязанай покрыўцы, той трапіў пад аўто

4 студзеня, Позірк. Аб ДТЗ з удзелам непаўналетніх у Любанскім раёне Мінскай вобласці паведаміла рэгіянальнае ўпраўленне ДАІ.

4 студзеня каля 06:20 на аўтадарозе Н8867 Чабуса — Касцешы, паводле папярэдняй інфармацыі, 17-гадовы вадзіцель, не маючы права кіравання, рухаўся на аўтамабілі Opel Omega і буксіраваў покрыўку ад аўтамабіля, на якой знаходзіўся яго аднагодак.

Покрыўка адвязалася, “у наступным на яе здзейсніў наезд аўтамабіль ВАЗ, які рухаўся ззаду, пад кіраваннем 18-гадовай дзяўчыны”.

У выніку ДТЗ другі з 17-гадовых хлопцаў з атрыманымі цялеснымі пашкоджаннямі шпіталізаваны.