Лукашэнка ў храме паскардзіўся, што яму не да адпачынку, і заклікаў беларусаў “брацца за працу”

7 студзеня, Позірк. Пасля шэрагу святаў, якія “былі мірнымі, добрымі і прайшлі пад мірным небам”, надыходзяць працоўныя будні, заявіў Аляксандр Лукашэнка, наведваючы на ​​Раство 7 студзеня праваслаўны храм у гонар абраза Божай Маці “Млекакарміцельніца” ў вёсцы Аколіца (Мінскі раён).

“Нехта, можа быць, і не адпачываў. Вы ведаеце, што ні мне, ані вайскоўцам у гэты час адпачынку ніякага быць не можа, калі адпачываюць нашы людзі, калі яны расслабленыя, больш думаюць пра сябе і сям’ю, — цытуе палітыка яго прэс-служба. — Людзям у пагонах (ды і мне як галоўнакамандуючаму) у гэты час мы да адпачынку. Але нічога страшнага, гэта мы ўсё вытрымаем. А мільёнам і мільёнам беларусаў трэба брацца за працу”.

“Задачы выразныя. Мэты вызначаныя. Хочам жыць добра — трэба выканаць тое, што мы нядаўна намецілі. Таму — за працу”, — дадаў ён.

Паводле сцвярджэння Лукашэнкі, Беларусь “мае усё для таго, каб людзі маглі жыць, карміць сябе і сваіх дзяцей”: “Пры ўмове, што яны працуюць. Без працы нічога не будзе”.

Спікер падзякаваў святарам за “тое добрае, што было зроблена ў Беларусі”, у тым ліку за “захаванне міру ў краіне”.

“Беларусаў нават крытыкавалі: вось, яны ўсё пра мірнае неба! А цяпер як ніколі нашы людзі зразумелі, што такое мірнае неба над галавой. Я ж заўсёды казаў, што калі будзе мір, усё астатняе (жартам я казаў) мы купім. А каб купіць, мы заробім. Мы ўсё зробім самі сваімі рукамі. Галоўнае, каб было ціха, спакойна і мірна”, — сказаў ён, не згадаўшы пра тое, што яго рэжым падтрымлівае вайну, развязаную Расіяй супраць Украіны.

Палітык нагадаў, што Беларусь — шматканфесійная краіна. Паводле яго слоў, “кожны чалавек мусіць знайсці дарогу да храма”, “ніхто гэтаму перашкаджаць не павінен”. Адметна, што многім беларускім палітвязням, паводле сведчанняў нядаўна вызваленых, забараняюць наведваць храмы і ўдзельнічаць у рэлігійных службах.

“Апошнім часам вельмі шмат кажуць, вельмі часта, асабліва дзяржаўныя службоўцы, ды і, напэўна, гэтым пачалі “пакутаваць” і нашы святары: “За Радзіму, за партыю і гэтак далей!” — заявіў Лукашэнка. — Ведаеце, я вам скажу проста, нядаўна пра гэта падумаў: за Радзіму ў нас ёсць каму змагацца і ісці наперадзе. Вы, калі ласка, падумайце пра свае сем’і, сваіх дзяцей, прав сваіх любімых. І памятайце, што ў любым складаным становішчы вы маеце абараніць менавіта гэтыя святыні ў вашым жыцці. А з усяго гэтага складзецца абарона нашай Радзімы”.

“Часта кажу пра гэта. Зрабіце тое, што вы маеце зрабіць на сваім працоўным месцы. Урач — у сябе ў бальніцы, у фельчарска-акушэрскім пункце, настаўнік — у школе, выкладчык — у ВНУ, дзяржаўны службоўца, святары — на сваіх месцах. І ўсё ў нас будзе нармальна. Усё астатняе — за мной”, — дадаў ён.

Палітык перадаў храму ікону Божай Маці “Мінская”, упрыгожаную напаўкаштоўнымі камянямі і пярлінамі. Яму ў сваю чаргу падарылі копію крыжа Еўфрасінні Полацкай “у арыгінальных памерах”.

Як паведамляў “Позірк”, арыгінал крыжа, выраблены ў 1161 годзе майстрам Лазарам Богшам і невядома куды вывезены з беларускай тэрыторыі ў гады Другой сусветнай вайны, унесены ў складзены ўладамі пералік культурных каштоўнасцяў, якія маюць быць вернутыя. Існуе версія, што арыгінал рэліквіі знаходзіцца ў Рускай праваслаўнай царквы, да якой адносіцца Беларускі экзахрат.