Летась у Літве перахоплена ў 3,2 раза больш кантрабандных цыгарэт, чым у 2024-м (статыстыка)

9 студзеня, Позірк. У 2025 годзе літоўскімі памежнікамі выяўлена 917 выпадкаў кантрабанды і незаконнай перавозкі тавараў (у 2024 годзе — 637), з якіх 911 тычыліся тытунёвых вырабаў, паведаміла 9 студзеня Служба аховы дзяржаўнай мяжы Літвы (САДМ).

Канфіскавана 4.440.576 пачкаў цыгарэт — у 3,2 раза больш, чым у 2024 годзе (1.386.714).

Самай папулярнай у кантрабандыстаў маркай стала Міпѕк (37% ад усіх канфіскаваных цыгарэт), на другім месцы — беларускія цыгарэты NZ (26%), далей ідуць Marlboro (15%) і Winston (13%).

50,1% канфіскаваных цыгарэт (больш за 2,2 млн пачкаў) былі ўвезеныя ў Літву праз унутраную мяжу ЕС з Латвіі, 49,2% — з Беларусі і 0,3% — з Расіі. Шлях пранікнення яшчэ 0,4% кантрабанды ў краіну невядомы. Адзначаецца, што такая сітуацыя назіраецца ўпершыню (раней большасць кантрабанды ўвозілася праз беларускую мяжу).

Ведамства адзначае, што ў сувязі з узмацненнем абароны мяжы з Беларуссю тэхнічнымі сродкамі, кантрабанда па сушы стала больш складанай. Таму больш за 80% цыгарэт, што ўвозіліся ў Літву з Беларусі ў 2025 годзе, перапраўлялася па паветры з дапамогай паветраных шароў або дронаў. Усяго такім чынам за год было дастаўлена і канфіскавана больш за 1,6 млн пачкаў цыгарэт.

Служба пацвердзіла раней распаўсюджаную інфармацыю аб тым, што летась было перахоплена агулам 635 партый цыгарэт, дастаўленых паветранымі шарамі з Беларусі ў Літву. У 2024 годзе такіх выпадкаў было 226. У 2022 годзе выпадкаў кантрабанды паветранымі шарамі не было, а ў 2023 годзе было зафіксавана 3 падобныя спробы.

Адзначаецца, што летась памежнікі таксама перахапілі 59 дронаў кантрабандыстаў, якія выкарыстоўваліся для перавозкі нелегальных цыгарэт з Беларусі ў Літву, у 2024 годзе іх было 54.

Паводле даных САДМ, летась знізілася інтэнсіўнасць сплаву беларускіх цыгарэт па прыгранічных рэках з дапамогай плытоў або розных збудаванняў з устаноўленым GPS-абсталяваннем. За год зафіксаваныя 32 спробы такой кантрабанды, на ваду было спушчана больш за 107 тыс. пачкаў тытунёвых вырабаў.

Памежнае ведамства падкрэслівае, што “розніца ў цэнах на цыгарэты ў Літве і Беларусі застаецца значнай, што стварае спрыяльныя ўмовы для незаконнага транспартавання і гандлю цыгарэтамі, асабліва ўлічваючы памяркоўнасць насельніцтва да больш танных кантрабандных цыгарэт”.

“Залішняя вытворчасць беларускай тытунёвай прамысловасці не скарачаецца. Улічваючы гэта, а таксама выгаднае геаграфічнае становішча Літвы, краіна застаецца прывабным пунктам для незаконнага транзіту тытунёвай прадукцыі ў іншыя краіны ЕС. Акрамя таго, беларускі рэжым выкарыстоўвае кантрабанду з дапамога паветраных шароў у якасці гібрыднай атакі супраць Літвы”, — заявілі ў памежнай службе.

“Ацаніўшы вышэйзгаданыя абставіны, САДМ заяўляе, што рызыка незаконнай перавозкі тытунёвай прадукцыі застаецца высокай”, — гаворыцца ў рэлізе.

6 студзеня стала вядома аб перахопе ў Літве першай з пачатку 2026 года партыі кантрабандных цыгарэт, дастаўленых з Беларусі з дапамогай двух паветраных шароў. Аэрастаты транспартавалі агулам 3.000 пачкаў цыгарэт Minsk Capital QS з беларускімі акцызнымі маркамі.

У той жа дзень стала вядома, што з ракі Нёман (Нямунас) у Літве памежнікамі быў вылаўлены плыт з 640 пачкамі беларускіх цыгарэт Minsk Capital QS.