У 2025 годзе амаль удвая вырасла колькасць затрыманых беларусаў, якія затрыманы літоўскімі памежнікамі

10 студзеня, Позірк. У 2025 годзе літоўскімі памежнікамі было затрымана 11 грамадзян Беларусі, якіх праваахоўнікі розных краін шукалі за ўчыненыя правапарушэнні, вынікае з інфармацыі Службы аховы дзяржаўнай граніцы (САДМ) пры МУС балтыйскай дзяржавы.

Паводле даных ведамства, годам раней такіх беларусаў было шэсць.

Усяго ў 2025 годзе пагранічнікі затрымалі 803 асобы, якія адшукваюцца (583 — у аэрапортах). Сярод затрыманых большасць — 702 чалавекі — былі грамадзянамі Літвы.

Грамадзянства Расіі мела 38 чалавек, Вялікабрытаніі — 15, Беларусі і Латвіі — па 11, Ірландыі — чатыры, Малдовы, Швецыі і Украіны — па тры, Ізраіля, Таджыкістана і Узбекістана — па два. Астатнія сем былі грамадзянамі іншых дзяржаў (па адной).

Сярод 767 асоб, якія адшукваюцца, затрыманых у 2024 годзе, таксама пераважалі грамадзяне Літвы — 705 чалавек. 19 затрыманых мелі грамадзянства Вялікабрытаніі, 16 — Украіны, шэсць — Беларусі, чатыры — Расіі, па тры —Грузіі і Малдовы, два — Ірландыі. Астатнія былі грамадзянамі яшчэ дзевяці розных дзяржаў.

Паведамляецца, што з пачатку 2026 года ўжо затрымана дзевяць грамадзян Літвы, два — Латвіі і адзін — Беларусі.

Звяртае на сябе ўвагу той факт, што колькасць затрыманых беларусаў у 2025 годзе з невядомых прычын скарацілася. 29 лістапада 2025 года САДМ паведамляла аб затрыманні з пачатку года 12 беларусаў, пры гэтым адначасова інфармуючы аб затрыманні 13-га з іх (на 20 лістапада іх колькасць таксама складала 12).

У выніковай жа гадавой статыстыцы фігуруе ўжо 11 чалавек.