СК пацвердзіў гібель Яны Кастранковай у Мінску

13 студзеня, Позірк. Аб устанаўленні асобы загінулай у Мінску дзяўчыны паведаміў 13 студзеня Следчы камітэт.

Ведамства пацвердзіла, што ёй аказалася 21-гадовая Яна Кастранкова.

Паводле даных СК, цялесных пашкоджанняў не выяўлена: “Смерць не носіць крымінальнага характару. Папярэдняя прычына — утапленне”.

“Прызначаны шэраг экспертных даследаванняў, у тым ліку судова-медыцынская экспертыза для ўстанаўлення дакладнай прычыны смерці дзяўчыны”, — гаворыцца ў рэлізе

Аб выяўленні ў акваторыі Сляпянскай воднай сістэмы, паблізу дома 25Г па вул. Філімонава (Першамайскі раён) у сталіцы цела дзяўчыны без бачных цялесных пашкоджанняў Следчы камітэт паведаміў 12 студзеня.

“Адзенне, якое знаходзіцца на ёй, па знешніх прыкметах падобнае на тое, у якое была апранута зніклая напярэдадні Яна Кастранкова”, — адзначалася ў паведамленні.

Пазней у той жа дзень гібель Кастранковай пацвердзіў пошукавы атрад “Анёл”.

Дзяўчына знікла 30 снежня 2025 года. 3 студзеня “Анёл” аб’яўляў пошук.