Усе банкі, што працуюць у Беларусі, упаўнаважаныя абслугоўваць дзяржпраграмы
17 студзеня, Позірк. Усе банкі, што працуюць у Беларусі, упаўнаважаныя абслугоўваць дзяржаўныя праграмы, вынікае з пастановы Савета міністраў № 18/1 ад 15 студзеня 2026 года.
У дакуменце, апублікаваным 16 студзеня на Нацыянальным прававым інтэрнэт-партале, фігуруе 21 банкаўская ўстанова: “Беларусбанк”, “Белаграпрамбанк”, “Прыёрбанк”, “Белінвестбанк”, “Альфа-Банк”, “Белгазпрамбанк”, “Сбер Банк”, “Белзнешэканомбанк” (“Банк БелВЭБ”), “МТБанк”, “Банк ВТБ (Беларусь)”, “Дабрабыт”, “Тэхнабанк”, “Банк гандлёвы капітал” (“ТК Банк”), “Беларускі народны банк” (“БНБ-Банк”), “БСБ Банк”, “Парытэтбанк”, “Банк Рашэнне”, “СтатусБанк”, “Неа Банк Азія”, “Цэптэр Банк” і “Банк росту і развіцця бізнесу” (“РРБ Банк”).
Менавіта такая колькасць банкаў (тры з іх — са 100-працэнтным замежным удзелам) зарэгістраваная ў Беларусі на сённяшні дзень. На 1 снежня 2025 года іх прыбытак складаў 4 млрд 171,1 млн рублёў, што, паводле праведзенага “Позіркам” аналізу даных Нацыянальнага банка, на 10,5% больш, чым месяцам раней (3 млрд 776,2 млн), і на 21,8% больш, чым на аналагічную дату 2024-га (3 млрд 425,7 млн).
Праверкі банкаў, што працуюць у Беларусі, паказалі, што іх прыбытак “часам выкарыстоўваецца не на тыя мэты, на якія варта”, заявіў Аляксандр Лукашэнка 9 верасня 2025 года ў Мінску на нарадзе з апаратам Нацбанка і кіраўніцтвам банкаў.
Паводле яго слоў, часам крэдытныя брокеры “працуюць пад прыкрыццём, проста як шпіёны: аказваюць кампутарныя паслугі, паслугі па расшыфроўцы крэдытнай гісторыі”.
“Рост памеру камісійнага ўзнагароджання, які спаганяецца банкамі, таксама застаецца пакуль па-за кантролем, — заявіў палітык. — Трэба імкнуцца да выгады праз справядлівасць, нельга думаць выключна катэгорыямі нажывы. Не забывайцеся, у нас у краіне каля 2,5 мільёна пенсіянераў. Каля 2 мільёнаў людзей жывуць у сельскай мясцовасці. Ці не моцна разняволіліся ў Нацбанку, апусціўшы павады ў кіраванні прыбыткамі банкаў?”
12 жніўня на сустрэчы са старшынёй праўлення Нацбанка, былым прэм’ер-міністрам Раманам Галоўчанкам Лукашэнка заявіў, што павелічэнне сукупнага прыбытку банкаў, якія працуюць у Беларусі, можа разглядацца як “пазітыўны паказчык”, аднак “маюцца асцярогі, каб не ўзнікла дысбалансу і банкі не адцягвалі грошы з эканомікі”.
У сувязі з гэтым, як адзначала прэс-служба палітыка, “у якасці аднага з захадаў на ўзроўні дзяржавы прынятае рашэнне забіраць частку прыбытку ў банкаў і накіроўваць іх на фінансаванне эканомікі”.
“У банках “лішніх” грошай быць не павінна. І прыбытак — усё адно гэта ад тых, хто гэтыя грошы там захоўвае. У асноўным гэта так. Таму я ў гэтым плане вельмі спадзяюся, што так і будзе. Эканоміка павінна развівацца, і трэба, каб банкаўская сістэма садзейнічала росту эканомікі”, — заявіў Лукашэнка.
Нацбанк фактычна забараніў злоўленым на нелаяльнасці грамадзянам займаць ключавыя пасады ў банках
7 снежня, Позірк. Злоўленым на нелаяльнасці да ўладаў грамадзянам фактычна забаронена займаць ключавыя пасады ў банках, вынікае з пастановы Нацыянальнага банка № 370 ад 20 снежня 2025 года. Дакумент, апублікаваны 7 студзеня на Нацыянальным прававым інтэрнэт-партале, карэктуе інструкцыю аб парадку …
Зацверджаная праграма развіцця прадпрымальніцтва да 2030 года — фінансаванне амаль цалкам кладзецца на банкі
20 снежня, Позірк. Дзяржаўную праграму "Устойлівае прадпрымальніцтва" на 2026–2030 гады зацвердзіў сваёй пастановай Савет міністраў, паведаміла 20 снежня прэс-служба ўрада. Мэта яе заключаецца ў стварэнні "спрыяльных умоў для ажыццяўлення прадпрымальніцкай дзейнасці і дынамічнага развіцця малога і сярэдняга прадпрымальніцтва" (МСП). Рэалізацыя …
