Беларусь і РФ у абаронным плане адзінае цэлае, мы гатовыя абараняць свае інтарэсы — Лукашэнка

19 студзеня, Позірк. Беларусь і Расію “дзяліць не трэба”, іх “ужо цяжка падзяліць”, заявіў Аляксандр Лукашэнка 19 студзеня ў Мінску на сустрэчы з губернатарам Кіраўскай вобласці РФ Аляксандрам Сакаловым.

“У абаронным плане мы з Расіяй тут як адзінае цэлае, і на нас глядзець асобна — на Беларусь, асобна на Расію — няма ніякага сэнсу, — цытуе палітыка яго прэс-служба. — Некаму хочацца, можа, але так не будзе. Мы гатовыя абараняць свае інтарэсы. А Гасподзь нам заўсёды дапаможа”.

Кажучы пра супрацу з Захадам, ён прапанаваў “супрацоўнічаць”, а не “коса глядзець адзін на аднаго”. “Мы хочам быць не нейкай раздзяляльнай лініяй, мы хочам быць мостам паміж Усходам і Захадам, як заўсёды гэта было”, — падкрэсліў Лукашэнка.

Палітык адзначыў, што праз непагадзь сёння ў Еўропе “праблем больш, чым у нас”. На гэтым фоне, на яго думку, еўрапейцы “нікуды не падзенуцца, каб купляць з Усходу газ”. “А не толькі з заходняга паўшар’я ў пяць разоў даражэй, чым Расія заўсёды прапаноўвала”, — заявіў ён.

“Мы не радуемся. Але я, шчыра кажучы, задаволены тым, што, нарэшце, Еўропа зразумела, дзе іх шчасце. Задоўга да ўсялякіх праблем, якія ў іх склаліся, публічна казаў пра тое, што месца Еўропы разам з намі, з Расіяй. Гэта наш дом, тут трэба шукаць шчасце”, — адзначыў спікер, не прывёўшы ніякіх пацверджанняў таму, што Еўропа бачыць “шчасце” разам з Беларуссю і РФ.

Лукашэнка лічыць, што Еўропа, “нарэшце, зразумела, што ёй трэба быць суб’ектам міжнародных стасункаў”: “Я не хачу, каб была канфрантацыя з амерыканцамі. Але Еўрапейскі саюз — гэта магутнае аб’яднанне, тэхналагічнае. Ну будзьце вы вартыя таго, каб звацца Еўрапейскім саюзам, тут жа разумныя людзі жывуць. Агромністая колькасць людзей”.

Лукашэнка і прэзідэнт РФ Уладзімір Пуцін 6 снежня 2024 года ў Мінску ў рамках пасяджэння Вышэйшага дзяржсавета Саюзнай дзяржавы падпісалі дагавор аб гарантыях бяспекі. Прэзідэнт РФ тады заявіў, што дакумент “вызначае ўзаемныя саюзніцкія абавязацельствы па забеспячэнні абароны, абарону суверэнітэту, незалежнасці і канстытуцыйнага ладу” дзвюх краін. Паводле яго слоў, таксама гаворка ідзе пра “цэласнасць і недатыкальнасць тэрыторыі і знешняй мяжы Саюзнай дзяржавы, прычым з задзейнічаннем усіх існых сіл і сродкаў”.

Пуцін тады ў чарговы раз нагадаў, што “гаворка ў тым ліку ідзе і пра расійскую тактычную ядзерную зброю” (ТЯЗ), размешчаную, як было заяўлена, “на прапанову” Лукашэнкі на тэрыторыі Беларусі. Ён зноў паўтарыў тэзу пра магчымасць выкарыстання ТЯЗ “у абарончых мэтах у адказ на магчымы напад з прымяненнем зброі масавага паражэння або пры адбіцці агрэсіі з прымяненнем звычайнай зброі, але той, што стварае крытычную пагрозу для суверэнітэту або тэрытарыяльнай цэласнасці”.

24 лютага 2022 года Расія распачала поўнамаштабную вайну супраць Украіны — найбуйнейшую ў Еўропе пасля Другой сусветнай. Рэжым Лукашэнкі надаў войску РФ тэрыторыю для нападу на суседнюю краіну ўзімку і ўвесну 2022 года, а пасля на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў. Расследавальнікі неаднаразова прадстаўлялі даныя, якія сведчаць пра тое, што многія беларускія прадпрыемствы актыўна займаюцца вытворчасцю на карысць расійскага вайскова-прамысловага комплексу.