28 студзеня, Позірк. За мінулыя суткі парушалася электразабеспячэнне ў 227 населеных пунктах, паведамляе дзяржаўнае вытворчае аб’яднанне электраэнергетыкі “Белэнерга”.
Больш за ўсё адключэнняў зафіксавана ў Гомельскай, Гродзенскай і Мінскай абласцях. Лініі электраперадачы пашкоджаны з-за непагадзі: наліпання снегу і абледзяненне.
Адзначаецца, што энергетыкі працуюць у кругласутачным рэжыме. Па стане на 8.00 задзейнічана 19 аварыйных брыгад і 20 адзінак тэхнікі.
“Белэнерга” папярэджвае, што ў выпадку выяўлення абарваных правадоў ліній электраперадачы не трэба падыходзіць да іх бліжэй за восем метраў і неадкладна паведамляць аб гэтых фактах (кароткія нумары аварыйных службаў — 115 і 144).
З рэлізу абласнога “Мінскэнерга” вынікае, што мацней за ўсё пацярпела менавіта сталічная вобласць, дзе зафіксаваны “тэхналагічныя парушэнні электразабеспячэння больш як у 200 населеных пунктах”.
“Сярэдні час аднаўлення электразабеспячэння склаў 1 гадзіну 48 хвілін, — гаворыцца ў паведамленні. — Найбольш значныя парушэнні адзначаны ў Слуцкім, Салігорскім, Барысаўскім і Стаўбцоўскім раёнах. На гэты момант сітуацыя стабілізуецца. Па стану на 9.30 аднаўленчыя работы прадаўжаюцца ў васьмі населеных пунктах”.
Паводле даных Белгідрамета, днём 28 студзеня па Беларусі пройдуць ападкі ў выглядзе мокрага снегу з дажджом, чакаецца моцная галалёдка. Парывы ветру ў многіх рэгіёнах дасягаюць 15–20 м/с. Быў аб’яўлены аранжавы ўзровень небяспекі.
Як паведамлялася, галалёд, які ўтварыўся на правадах, пашкодзіў тралейбусныя лініі ў розных раёнах Мінска 27 студзеня. Прадпрыемства “Мінсктранс” выпусціла паўтара дзесятка папярэджанняў аб спыненні руху на розных маршрутах.
Аўтарызавацца
Забыліся пароль?
Выхад з профілю
