Улады маюць намер “своечасова рабіць захады рэагавання” для падтрымання базавай інфляцыі на ўзроўні 5% — Галоўчанка

29 студзеня, Позірк. Для падтрымання базавай інфляцыі ў 2026 годзе на ўзроўні 5% “сфармаваная і пралічаная прыкладная траекторыя руху гэтага паказчыка”, заявіў кіраўнік Нацыянальнага банка Раман Галоўчанка 29 студзеня на пашыраным пасяджэнні праўлення рэгулятара.

Паводле даных Нацбанка, у снежні 2025 года базавая інфляцыя склала 7,3% (у гадавым вымярэнні).

“Пытанне пастаўленае на аператыўны кантроль, каб своечасова рабіць захады рэагавання і сумесна з урадам забяспечыць гэты параметр у межах [паказчыка], вызначанага праграмай сацыяльна-эканамічнага развіцця”, — падкрэсліў Галоўчанка.

Кіраўнік Нацбанка адзначыў, што нізкія тэмпы інфляцыі неабходныя для “планавання арганізацыямі доўгатэрміновых інвестыцый з улікам даступнасці сродкаў, якія прыцягваюцца эканомікай, для свайго развіцця”.

“Па сутнасці, гэта базавыя ўмовы для эканамічнага росту і падвышэння ўзроўню жыцця насельніцтва”, — патлумачыў ён.

Паводле слоў Галоўчанкі, у 2025 годзе не атрымалася забяспечыць выкананне мэтавых паказчыкаў, зацверджаных указам № 385: “Інфляцыя склала, як вядома, 6,8%, што выходзіць за рамкі 5-працэнтнага прагнозу”.

Разам з тым, сцвярджае чыноўнік, працэс цэнаўтварэння “кіраваны, знаходзіцца на сталым кантролі ўрада і Нацбанка”.

“Да канца 2025 года атрымалася запаволіць інтэнсіўнасць інфляцыйных працэсаў. Атрыманы вынік, з прычыны значнага ўплыву знешніх фактараў, у цэлым можна лічыць прымальным”, — падсумаваў кіраўнік рэгулятара.

Раней “Позірк” паведамляў, што спажывецкія цэны ў снежні 2025 года выраслі на 0,3%. Харчовыя тавары падаражэлі на 0,4%, нехарчовыя — на 0,2%, паслугі — на 0,3%.

У параўнанні са снежнем 2024 года цэны выраслі на 6,8%: харчовыя тавары сталі даражэйшымі на 9%, нехарчовыя — на 3%, паслугі — на 8%.

Памесячныя паказчыкі “дапушчальнага росту цэн” да канца 2026 года зацверджаныя пастановай Міністэрства антыманапольнага рэгулявання і гандлю № 84 ад 30 снежня 2025-га.

Гадавы прырост не павінен перавысіць 7%, як і закладзена ў зборы найважнейшых прагнозных паказчыкаў развіцця Беларусі.

У студзені цэны не павінны вырасці больш як на 0,7% да ўзроўню снежня 2025-га. Далей нарастальным вынікам: люты — не больш за 2%, сакавік — 2,5%, красавік — 3,1%, травень — 3,4%, чэрвень — 3,8%, ліпень — 4%, жнівень — 4,2%, верасень — 4,9%, кастрычнік — 5,5%, лістапад — 6,2%.

Тэндэнцыю інфляцыі, якая ўсё расце, “неабходна пераламаць”, заявіў Аляксандр Лукашэнка 9 верасня 2025 года ў Мінску на нарадзе з апаратам Нацбанка і кіраўніцтвам банкаў.