У Літве 28 асобам выстаўленыя абвінавачванні ў кантрабандзе цыгарэт з Беларусі з дапамогай метэазондаў
4 лютага, Позірк. 28 чалавек з’яўляюцца ў Літве падазраванымі па крымінальнай справе аб кантрабандзе цыгарэт з Беларусі з дапамогай паветраных шароў, паведамляе партал lrt.lt са спасылкай на агенцтва BNS.
Сярод падазраваных асобы, якія з’яўляюцца “магчымымі кіраўнікамі злачыннага аб’яднання”, адзначаецца ў публікацыі.
Паводле слоў галоўнага пракурора дэпартамента расследавання арганізаванай злачыннасці і карупцыі Генеральнай пракуратуры краіны Артураса Урбяліса, пяцёра фігурантаў, “верагодна, кіравалі кантрабандай на тэрыторыі Літвы”.
“Пракурор адзначыў, што гэта жыхары Шальчынінкскага раёна сталага ўзросту, усе яны раней ужо мелі судзімасці, уключаючы справы аб кантрабандзе або незаконным абароце акцызных тавараў. Гэтыя падазраваныя былі затрыманыя ў панядзелак у ходзе маштабнай аперацыі. Пракуратура ўжо звярнулася ў суд з хадайніцтвам аб іх арышце”, — гаворыцца ў публікацыі.
Як мяркуе намеснік начальніка Бюро крымінальнай паліцыі Літвы Саўлюс Брыгінас, падазраваныя задзейнічалі ў кантрабандзе цыгарэт “злачынныя групоўкі суседняй краіны”.
Раней паведамлялася, што летась перахоплена агулам 635 партый цыгарэт, дастаўленых паветранымі шарамі з Беларусі ў Літву. У 2024 годзе такіх выпадкаў было 226. У 2022 годзе выпадкаў кантрабанды паветранымі шарамі не было, а ў 2023 годзе было зафіксавана 3 падобныя спробы.
29 кастрычніка 2025 года стала вядома аб затрыманні ў Літве чатырох чалавек, падазраваных у датычнасьці да кантрабанды цыгарэт з Беларусі з дапамогай аэрастатаў.
Як паведаміла тады генеральны пракурор балтыйскай краіны Ніда Грунскене, з пачатку 2025-га па факце перавозкі кантрабандных цыгарэт па паветры пачата 21 дасудовае расследаванне, устаноўлена 50 падазраваных.
Адносіны Вільнюса і Мінска абвастрыліся ў канцы 2025 года на фоне рэгулярных і масавых прылётаў у краіну з Беларусі паветраных шароў з кантрабанднымі цыгарэтамі. Праз гэта прыпынялі працу літоўскія аэрапорты, Вільнюс закрываў мяжу, а рэжым Лукашэнкі каля трох месяцаў утрымлівае на беларускай тэрыторыі каля тысячы літоўскіх грузавікоў.
29 студзеня паведамлялася, што Вільнюс і Мінск узгадняюць “парадак дня і нейтральнае месца сустрэчы намеснікаў міністраў замежных спраў Літвы і Беларусі”.
Паводле слоў старшыні Камітэта па замежных справах Сейма Рэмігіюса Матузаса, “Беларусь зараз правакуе, каб адбылася сустрэча на ўзроўні віцэ-міністраў, зараз ад гэтага не адмаўляюцца, гэта разглядаецца”.
Сярод інтарэсаў Вільнюса Матузас пералічыў “прадухіленне гібрыдных пагроз і вызваленне грузавікоў літоўскіх кампаній, што захраслі ў Беларусі”.
