Паводле даных Мінабароны Польшчы, сярэдняя цана кантрабанды адным паветраным шарам з Беларусі — звыш 8 тыс. долараў

9 лютага, Позірк. Запуск метэазондаў з кантрабандай з Беларусі ў Польшчу носіць правакацыйна-кантрабандысцкую мэту, заявіў 9 лютага на прэс-канферэнцыі ў Варшаве віцэ-прэм’ер, міністр абароны Польшчы Уладзіслаў Касіняк-Камыш.

“Гэта — гібрыдная вайна. З аднаго боку — заробак пэўнай групы, якая мае дазвол ад Беларусі на кантрабанду, з другога боку — спроба заспець знянацку і ​​пасеяць непакой”, — сказаў ён.

Паводле міністра, тое, што адбываецца, ажыццяўляецца альбо беларускімі службамі, альбо пры іх падтрымцы. Кіраўнік ведамства падзякаваў Пагранічнай службе, якая займалася перахопам метэазондаў, і паведаміў аб затрыманні рознанацыянальнай групы кантрабандыстаў.

Касіняк-Камыш паведаміў таксама, што сярэдняя цана кантрабанды, якая перамяшчаецца адным шарам, складае каля 30 тыс. злотых (8,5 тыс. долараў).

У ноч на 9 лютага ваенныя радыёлакацыйныя сістэмы зафіксавалі “чарговыя ўлёты ў польскую паветраную прастору аб’ектаў, якія па характарыстыках нагадваюць паветраныя шары”.

Як паведаміла Аператыўнае камандаванне родаў Узброеных сіл Польшчы, “аб’екты ідэнтыфікаваліся і знаходзіліся пад назіраннем ваенных сістэм разведкі ў рэжыме рэальнага часу”, сітуацыя была “цалкам кантралюемай і не ўяўляла пагрозы для бяспекі паветранага руху і грамадзян Рэспублікі Польшча”.

“Узброеныя сілы, дзейнічаючы ў адпаведнасці з дзеючымі працэдурамі, супрацоўнічаюць са службамі, адказнымі за бяспеку дзяржавы, аператыўна перадаючы неабходную інфармацыю, якая забяспечвае хуткую рэакцыю, уключаючы перахоп аб’ектаў і затрыманне асоб, якія падазраюцца ва ўдзеле ў гэтых інцыдэнтах”, — падкрэсліла ваенная структура.

Характэрна, што на гэты раз, як і пры парушэнні польскай паветранай прасторы ў ноч на 4 лютага, не гаворыцца, з якога боку ляцелі аб’екты.

Пры гэтым з канца мінулага месяца Польшча зафіксавала сама меней чатыры серыі парушэнняў паветранай прасторы з боку Беларусі (28 студзеня, 31 студзеня, 1 лютага і 2 лютага). Ва ўсіх гэтых выпадках у аб’ектах, якія ўварваліся, распазнавалі аэрастаты, з дапамогай якіх з беларускай тэрыторыі дастаўляюцца кантрабандныя грузы.

2 лютага Памежная ахова Польшчы паведаміла, што ў студзені 2026 года ў краіне выяўлена каля 1,75 млн цыгарэт, дастаўленых з Беларусі з дапамогай паветраных шароў. Цана канфіскаванага тавару ацэньваецца прыкладна ў 1,78 млн злотых (каля 497 тыс. долараў).