У 2025 годзе Польшча адмовіла ва ўездзе 1.135 беларусам
10 лютага, Позірк. У 2025 годзе на беларускім участку знешняй мяжы Еўрасаюза Польшча адмовіла ва ўездзе 1.761 замежніку, што на 13% больш, чым годам раней (1.558), паведамляе памежная служба гэтай краіны.
За мінулы год Польшча не прапусціла на сваю тэрыторыю 1.135 беларусаў (1.420 у 2024 годзе), з якіх 1.042 (1.259) спрабавалі ўехаць праз беларускі ўчастак знешняй мяжы ЕС.
Колькасць беларусаў, якія падалі заявы аб наданні міжнароднай абароны праз органы польскай памежнай службы, у 2025 годзе склала 2.749 (годам раней 3.664).
Колькасць замежнікаў, затрыманых або выяўленых Памежнай службай Польшчы за незаконнае перасячэнне дзяржаўнай мяжы з парушэннем устаноўленых правіл або спробу такога перасячэння на беларускім адрэзку мяжы, у 2025 годзе склала 289, што на 89% менш, чым год раней (2.582).
Пры гэтым агулам за незаконнае перасячэнне дзяржаўнай мяжы або яго спробу было затрымана або выяўлена 173 грамадзяніна Беларусі (134 — на ўездзе ў Польшчу, 39 — на выездзе).
Выяўлена 56 грамадзян Беларусі, якія выкарыстоўвалі падробленыя дакументы, што даюць права на перасячэнне мяжы або знаходжанне на тэрыторыі Польшчы (68 у 2024-м).
