Мытня спыніла ўвоз з Польшчы 260 кг гашышу

17 лютага, Позірк. Увоз у Беларусь 260 кг гашышу спынены ў пункце пропуску Бераставіца (з польскага боку — Баброўнікі), паведамляе Дзяржаўны мытны камітэт (ДМК).

У грузавым аўтамабілі польскага перавозчыка паводле дакументаў перавозіўся зборны груз на адрас беларускага атрымальніка. Паводле даных ДМК, апошні не ведаў, што злачынцы схавалі ў таварах, што законна ўвозяцца, гашыш.

Канчатковым атрымальнікам партыі гашышу быў 41-гадовы грамадзянін Расіі, гаворыцца ў паведамленні.

Гродзенскай рэгіянальнай мытняй і Цэнтральнай аператыўнай мытняй ФТС РФ распачаты крымінальныя справы. Удзельнікам злачыннай групы пагражае пазбаўленне волі на тэрмін да 20 гадоў, адзначае беларускае мытнае ведамства.

У 2025 годзе колькасць асуджаных паводле “наркатычных” артыкулаў Крымінальнага кодэкса павялічылася на 7,9% у параўнанні з 2024-м, вынікае з даных Вярхоўнага суда Рэспублікі Беларусь.

За здзяйсненне злачынстваў, звязаных з незаконным абаротам наркотыкаў (арт. 327–331, 332), летась асуджана 2.253 чалавекі — 8% усіх асуджаных (у 2024-м — 2.088; 6,6%).

З іх 2.077, або 92,2%, прызнана вінаватымі паводле арт. 328 (незаконны абарот наркатычных сродкаў, псіхатропных рэчываў, іх прэкурсораў і аналагаў). У 2024 годзе — 1.956, або 93,7%.

Гл. таксама:

Больш за 150 кг псіхатропу канфіскавана ў беларуса пры ўездзе з Польшчы

Спыненая спроба завезці з Польшчы буйную партыю гашышу — у Беларусі і РФ затрыманыя восем “датычных да злачыннай схемы”

У Варшаве затрыманы грамадзянін Беларусі — у яго знойдзена 340 г розных наркотыкаў

Мытня справаздачылася аб спыненні буйнога канала пастаўкі небяспечнага псіхатропу з ЕС у Расію