Рассельгаснагляд спыніў увоз з Беларусі васьмі кароў

18 лютага, Позірк. Пра “спыненне незаконнага перамяшчэння” з Беларусі васьмі галоў буйной рагатай жывёлы паведаміла 18 лютага прэс-служба Паўночна-Заходняга міжрэгіянальнага ўпраўлення Федэральнай службы па ветэрынарным і фітасанітарным наглядзе (Рассельгаснагляд).

Паводле звестак ведамства, падчас кантролю ў размешчанай на мяжы з Беларуссю вёсцы Лабок Пскоўскай вобласці інспектарамі “было ўстаноўлена, што каровы перамяшчаліся без ветэрынарных суправаджальных дакументаў, якія пацвярджаюць іх паходжанне, правядзенне неабходных даследаванняў, вакцынацый і апрацовак, таксама на жывёл адсутнічалі сродкі ідэнтыфікацыі (біркі, вышчыпы, кляйма)”.

Акрамя таго, гаворыцца ў рэлізе, сельскагаспадарчыя жывёлы “перавозіліся ў неабсталяваным для іх транспарціроўкі аўтатранспартным сродку, а іх маршрут не быў узгоднены з Рассельгаснаглядам”.

“Перамяшчэнне сельгасжывёл па мытнай тэрыторыі Еўразійскага эканамічнага саюза забаронена, аформлены акт аб вяртанні. Жывёлы вернутыя на тэрыторыю Рэспублікі Беларусь”, — паведаміў Рассельгаснагляд.

21 студзеня расійскае ведамства вярнула ў Беларусь шэсць быкоў галштынскай пароды, 30 снежня мінулага года было затрымана і пасля вернута 24 галавы буйной рагатай жывёлы.