Мэрыя Вільнюса і Мінкульт Літвы заклікаюць забараніць канцэрты артыстаў, якія выступаюць у Беларусі і Расіі

27 лютага, Позірк. Міністэрства культуры Літвы падтрымлівае ініцыятыву мэра Вільнюса Валдаса Бенкунскаса, які прапанаваў на заканадаўчым узроўні забараніць выступаць выканаўцам, якія даюць канцэрты ў Беларусі і Расіі.

Паводле слоў кіраўніка ведамства Вайды Алекнавічэне, якія прыводзіць Delfi, крытэрыі прыняцця рашэння аб дазволе замежнаму выканаўцу праводзіць канцэрт будуць абмяркоўвацца на сустрэчы з кіраўніцтвам Міністэрства замежных спраў 27 лютага.

“Мы станоўча ацэньваем неабходнасць устанаўлення канкрэтных правілаў і працэдур ужо цяпер, каб у такой геапалітычнай сітуацыі мы маглі прымаць прэвентыўныя або рашучыя меры. Я лічу, што неабходныя прававыя меры на нацыянальным узроўні, якія прадухілілі б распаўсюд “мяккай сілы“ варожых дзяржаў у Літве“, — заявіла чыноўніца Žinių radijas. Паводле яе слоў, на сустрэчы ў МЗС плануецца абмеркаваць, “якія захады варта распачаць, як у выніку вырашыць гэтую праблему, паколькі яна паўтараецца ўжо шмат гадоў“.

Кіраўнік Вільнюса прапануе ўнесці папраўкі ў закон аб прававым статусе замежнікаў, якія прадугледжваюць, што ўезд у Літву будзе забаронены асобам, якія ажыццяўлялі грамадскую культурную, забаўляльную, камерцыйную і іншую дзейнасць у Расіі, Беларусі або на акупаваных пасля 24 лютага 2022 года тэрыторыях Украіны.

Зараз, паводле слоў мэра, адсутнічаюць як выразныя прававыя крытэрыі, так і аператыўна дзеючая сістэма інстытутаў, здольных хутка рэагаваць і прадухіляць прыезд у Літву непажаданых артыстаў з Расіі ці Беларусі. У той жа час ён адзначае, што краіна павінна праявіць у гэтым пытанні “свой каштоўнасны хрыбет“.

Пасля абмеркавання магчымасці выступлення ў Вільнюсе ў сакавіку грузінскага выканаўцы Гія Пікі, які неаднаразова гастраляваў па Расіі, міністр унутраных спраў Уладзіслаў Кандратовіч прыняў рашэнне забараніць выканаўцу ўезд у Літву да 19 лютага 2031 года.

24 лютага 2022 года Расія пачала поўнамаштабную вайну супраць Украіны — найбуйнейшую ў Еўропе пасля Другой сусветнай. Рэжым Лукашэнкі падаў войску РФ тэрыторыю для нападу на суседнюю краіну зімой і вясной 2022 года.

21 ліпеня 2022 года ў інтэрв’ю французскаму інфармацыйнаму агенцтву “Франс Прэс” Лукашэнка паведаміў, што з Беларусі ва Украіну была ўведзеная 20-тысячная групоўка расійскіх войскаў.

Цягам многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў.

Расследавальнікі неаднаразова прадстаўлялі звесткі, якія сведчаць пра тое, што многія беларускія прадпрыемствы актыўна займаюцца вытворчасцю на карысць расійскага вайскова-прамысловага комплекса.

18 лютага 2026 года прэзідэнт Украіны Уладзімір Зяленскі паведаміў аб увядзенні санкцый супраць Лукашэнкі. Зяленскі заявіў, што Украіна “актывізуе супрацьдзеянне ўсім формам садзейнічання“ Лукашэнку “забойствам украінцаў“ і будзе “працаваць з партнёрамі так, каб гэта мела глабальны эфект“.

Паводле слоў украінскага лідара, у другой палове 2025 года на тэрыторыі Беларусі расіяне разгарнулі сістэму рэтранслятараў для кіравання ўдарнымі дронамі, што павялічыла магчымасці арміі РФ наносіць удары па паўночных абласцях Украіны.

Зяленскі даручыў уважліва вывучыць“усе схемы Аляксандра Лукашэнкі і ягоных саўдзельнікаў”.