Нацбанк устанавіў на сакавік паніжаныя значэнні разліковых велічынь стандартнай рызыкі

27 лютага, Позірк. Нацыянальны банк з 1 сакавіка 2026 года зніжае разліковыя велічыні стандартнай рызыкі (РВСР), устаноўленыя 1 студзеня.

“Прымаючы рашэнне аб зніжэнні значэнняў РВСР, Нацбанк, з аднаго боку, падтрымлівае тэндэнцыю зніжэння банкамі працэнтных ставак як па крэдытах, так і па дэпазітах, з другога — стымулюе банкі крэдытаваць інвестыцыйныя праекты“, — заявіў кіраўнік рэгулятара Раман Галоўчанка 27 лютага, у дзень дакладу аб праведзенай працы ў Палаце прадстаўнікоў Нацыянальнага сходу.

Прэс-служба НБ прыводзіць новыя стаўкі:

– па новых тэрміновых безадзыўных банкаўскіх укладах (дэпазітах) фізічных асоб у рублях з тэрмінам вяртання ад 1 да 3 гадоў — 14,34% гадавых (было 14,82%; -0,48 адсоткавага пункта);

– па новых тэрміновых безадзыўных банкаўскіх укладах (дэпазітах) фізічных асоб у рублях з тэрмінам вяртання больш за 3 гады — 15,31% гадавых (было 15,62%; -0,31 а.п.);

– для новых крэдытаў, прадастаўленых фізічным асобам (за выключэннем ільготных), — 18,49% (18,92%; -0,43 а.п.);

– для новых крэдытаў, прадастаўленых юрыдычным асобам (за выключэннем ільготных, інвестыцыйных), — 12,91% (13,06%; -0,15 а.п.);

– для новых інвестыцыйных крэдытаў, прадастаўленых юрыдычным асобам (за выключэннем ільготных) засталося без змен — 11,8%.

Сістэму мер макрапрудэнцыяльнага характару, накіраваную на абмежаванне сістэмнай рызыкі, генераванай бізнес-мадэлямі банкаў з павышаным рызыка-апетытам, Нацбанк увёў 1 сакавіка 2019 года.

У яе аснове ляжыць падыход, у адпаведнасці з якім да банкаў, якія рэалізуюць такія бізнес-мадэлі, прымяняюцца павышаныя рэгулятарныя патрабаванні ў галіне дастатковасці капіталу, фарміравання спецыяльных рэзерваў на пакрыццё магчымых страт і фармавання фонду абавязковых рэзерваў.

У якасці індыкатара, які паказвае на павышаны ўзровень рызыкі бізнес-мадэляў, што рэалізуюць банкі, выкарыстоўваецца перавышэнне устаноўленых працэнтных ставак па новых укладах, крэдытах і эмітаваных аблігацыях над адпаведнымі РВСР. У аснове алгарытму разліку індыкатара ляжыць сярэдняе арыфметычнае, а таксама мера варыяцыі працэнтных ставак, якія бяруцца ў разлік.

Рэгулятар 25 чэрвеня 2025 года павысіў стаўку рэфінансавання з 9,5% да 9,75% гадавых. Гэтае рашэнне старшы навуковы супрацоўнік даследчага цэнтра BEROC Анатоль Харытончык назваў “эканамічна абгрунтаванай, але моцна запозненай мерай”.

На яго думку, рашэнне Нацбанка “адпавядае сітуацыі, што склалася ў эканоміцы, у прыватнасці, яе перагрэву, інфляцыйнага ціску“, але яно “павінна было прымацца яшчэ ў другой палове 2023 года“.

Эксперт звярнуў увагу на нязначнасць змены стаўкі, адзначыўшы, што такое павышэнне “носіць абсалютна сімвалічны характар“, бо з улікам інфляцыі стаўка ў рэальным вымярэнні “нават знізілася“.