У апошні дзень зімы ў мінскай Свіслачы патануў сапбардыст

28 лютага, Позірк. 28 лютага ў рацэ Свіслач у раёне сталічнага праспекта Незалежнасці патануў чалавек, паведамляе прэс-служба Міністэрства па надзвычайных сітуацыях.

Паводле інфармацыі ведамства, мужчына і жанчына каталіся на сапбордах. У нейкі момант яны страцілі раўнавагу і ўпалі ў ваду. Жанчына выцягнула кампаньёна на бераг.

Медыкі, што прыбылі на месца здарэння, спрабавалі рэанімаваць мужчыну, але марна.

“Прычына гібелі і абставіны здарэння высвятляюцца”, — заявіла міністэрства, адзначыўшы, што абодва сапбардысты былі ў гідракасцюмах сухога тыпу, без выратавальных камізэлек.

Паводле інфармацыі Таварыства ратавання на водах, у 2025 годзе зарэгістравана 492 здарэнні на вадаёмах, у тым ліку 54 — з непаўналетнімі (у 2024-м — 586 і 75 адпаведна; -16% і -28%).

Ад утаплення загінула 278 чалавек (368; -24,5%), у тым ліку 12 непаўналетніх (22; -45,5%).