BelPol паведаміў пра недахоп работнікаў на холдынгу “Бабруйскаграмаш”
3 сакавіка, Позірк. Пра недахоп работнікаў у ААТ “Кіруючая кампанія холдынгу “Бабруйскаграмаш” (Бабруйск, Магілёўская вобласць) паведаміла 3 сакавіка аб’яднанне BelPol.
Спасылаючыся на наяўнасць у яго распараджэнні звароту холдынга ў Міністэрства прамысловасці, BelPol адзначыў, што “сутнасць запыту паказальная”: “Прадпрыемства просіць аказаць садзейнічанне ў падборы персаналу паводле дамоў аутстафінгу — гэта значыць фактычна арандаваць работнікаў у старонніх структураў, не прымаючы іх у штат”.
“Сам факт такога звароту — трывожны сігнал. Вялікі дзяржаўны машынабудаўнічы холдынг больш не ў стане самастойна закрываць базавыя вытворчыя патрэбы і вымушаны шукаць “часовыя рукі”, каб хоць як-небудзь падтрымліваць працоўны працэс”, — гаворыцца ў паведамленні.
На момант атрымання дакумента прадпрыемству патрабавалася 35 супрацоўнікаў на “крытычна важныя пазіцыі”: слесары механазборачных работ — 10 чалавек; маляры — 15; машыністы крана — 10.
У BelPol падкрэсліваюць, што “гаворка ідзе не пра высокакваліфікаваных інжынераў або унікальных спецыялістаў, а пра базавыя рабочыя прафесіі, без якіх любая машынабудаўнічая вытворчасць проста спыняецца”.
Цяпер, згодна з інфармацыяй на сайце “Бабруйскаграмаша”, на прадпрыемствах холдынгу адкрыты вакансіі па 38 спецыяльнасцях.
BelPol нагадаў пра аналагічны зварот 28 студзеня гэтага года генеральнага дырэктара ААТ “МАЗ” — кіруючай кампаніі холдынгу “БЕЛАЎТАМАЗ” Валерыя Іванковіча, які прасіў накіраваць яму 397 работнікаў прадпрыемстваў сістэмы Мінпраму.
Паводле даных Парламенцкай асамблеі Савета Еўропы, ад 200 да 500 тыс. чалавек пакінулі Беларусь пасля падзей жніўня 2020 года. Кіраўніцтва вярхоўнага камісара ААН па правах чалавека называла меншую лічбу — 100 тыс. Згодна з апошнім дакладам Міжнароднай арганізацыі па міграцыі ААН, у 2024 годзе за мяжой пражывала 790,2 тыс. беларускіх грамадзян.
Дэфіцыт працоўных рук у Беларусі з’яўляецца “доўгатэрміновым і стратэгічным выклікам як у колькасным, так і ў якасным аспектах”, заявіла ў траўні 2025 года намесніца міністра эканомікі Таццяна Бранцэвіч. Яна пераканана, што на першым месцы паводле актуальнасці для Беларусі павінна стаяць “задача не прыцягнення новых працоўных рэсурсаў здалёк”, а ўтрыманне сваіх кадраў, а яшчэ лепш — “вяртанне міграваўшых суграмадзян”.
У 2025 годзе колькасць звольненых у Беларусі работнікаў перавысіла колькасць нанятых на 1,9% (768.633 супраць 754.081), вынікае з праведзенага “Позіркам” аналізу даных Нацыянальнага статыстычнага камітэта.
