Украінец трапіў пад крымінальны пераслед у Беларусі, паспрабаваўшы ўпотай вывезці ў Польшчу буйную суму валюты

6 сакавіка, Позірк. Брэсцкая мытня затрымала грамадзяніна Украіны — пасажыра рэйсавага аўтобуса, што накіроўваўся ў Польшчу, паведаміла 6 сакавіка прэс-служба Дзяржаўнага мытнага камітэта.

Паводле інфармацыі ведамства, у пункце пропуску Брэст (з польскага боку — Цярэспаль) 62-гадовы мужчына заявіў мытнікам, што не мае тавараў і наяўных грошай, якія трэба дэклараваць, таму для перасячэння мяжы абраў “зялёны калідор”.

Аднак у наплечнай сумцы пасажыра супрацоўнікі мытні знайшлі больш за 37 тыс. долараў ЗША.

У дачыненні да мужчыны ўзбуджаная крымінальная справа паводле ч. 1 арт. 14 (замах на злачынства), ч. 2 арт. 228 (кантрабанда) Крымінальнага кодэкса, яму пагражае да 5 гадоў пазбаўлення волі. Грошы вынятыя да рашэння суда.

“Беларуская мытня неаднаразова папярэджвала пра неабходнасць абавязковага дэкларавання сум, якія перавышаюць у эквіваленце 10 тыс. долараў ЗША. Незаконнае перамяшчэнне звыш 30 тыс. долараў ЗША — ужо крымінальная адказнасць”, — папярэдзіла ведамства.