8 сакавіка, Позірк. Камісар па пытаннях пашырэння ЕС Марта Кос на сваёй старонцы ў “Фэйсбуку” назвала жанчын, якія яе натхняюць.
Запіс еўракамісар зрабіла з нагоды Міжнароднага дня барацьбы за правы жанчын (8 сакавіка)
Пад нумарам два ў спісе Кос указала дэмакратычнага лідара Святлану Ціханоўскую. Беларускі палітык, паводле слоў еўракамісара, “вучыць нас, што часам можна змяніць свет, праяўляючы цярпенне і маральную чысціню”.
Першай Кос назвала прэзідэнта Малдовы Маю Санду.
Таксама названыя кіраўніца Міжнароднага валютнага фонду Крысталіна Георгіева, славенская антраполаг і сацыёлаг Ніка Ковач, каардынатар Нацыянальнай канвенцыя па ЕС (NCEU) у Сербіі Баяна Селаковіч, рух “Маці Срэбраніцы” (Боснія і Герцагавіна), жаночая экспертная платформа ONA VE (Славенія), а таксама рух “Электа”, які, паводле слоў Кос, прасоўвае “большы ўдзел жанчын у палітыцы, незалежна ад партыйнай прыналежнасці”.
Раней Кос сустракалася з Ціханоўскай. У прыватнасці, такая сустрэча была 6 сакавіка ў Бруселі на палях 6-га пасяджэння Кансультатыўнай групы ЕС, беларускіх дэмакратычных сіл і грамадзянскай супольнасці. Прысутнічалі таксама вярхоўны прадстаўнік ЕС па замежных справах і палітыцы бяспекі Кая Калас, намеснік кіраўніка Аб’яднанага пераходнага кабінета, кіраўнік Народнага антыкрызіснага ўпраўлення Павел Латушка, а таксама экс-палітвязні — прэтэндэнт на пасаду прэзідэнта ў 2020 годзе Віктар Бабарыка і прадстаўніца яго штаба Марыя Калеснікава.
